EDITORYAL - Magmalampuson unta si Gwen

Makigkita si Gob. Gwendolyn Garcia sa mga lider sa duha ka fraternity dinhi sa Sugbo kinsa ginganlan nag "notoryus" sa daghang mga lomulopyo ning dapita gumikan sa ilang kalambigitan sa daghang krimen.

Kining duha ka fraternity mao ang Alpha Kappa Rho ug Tau Gamma Phi.

Gumikan sa matud pa kalambigitan niining duha ka pundok sa daghang mga bayolenteng insidente sa lalawigan, mibahad na si Provincial Police Director Vicente Loot nga iya kining ideklarar nga "criminal groups" ang duha ka pundok.

Apan matud ni Gobernador Garcia, makigkita una siya sa mga lider niining maong mga pundok una pa tumanon ni Loot ang iyang bahad.

Gihangop sa kadaghanan kining desisyon sa gobernador nga makigkita sa mga lider sa Akrho ug Tau Gamma bisan pa nga naa usay daghang nagtuo nga ang himuon ni Gwen usa ka "exercise in futility" kay ang panag-away niining duha ka frat mora naman kunog "du't na sa bukog."

Naay mga tigpaniid nga nagtuo nga kun magkakita man gyud ang mga lider sa duha ka pundok ug ang gobernador wala gihapoy ayo ang mahitabo gumikan kay makadaghan nang higayon nga ilang gipanghimakak nga kalambigitan sa ilang mga sakop sa pipila ka mga krimen nga nanghitabo. Kini bisan pa nga ang mga sakop mismo nga na-involved sa krimen miangkon nga sila miyembro sa mga frat nga gihisgutan.

Apan manghinaut lang ta gihapon nga adunay maayong makab-ot ang pagahimuon sa gobernador. Magmalampuson unta siya alang sa kalinaw ug kahusay sa atong komunidad nga, matag karon ug unya, tay-ogon sa mga bayolenteng hitabo diin nalambigit ang mga sakop ning duha ka fraternity.