Radaza nasayop, apan husto siya

"Naghinubra na ang gihimo ni Lapu-Lapu City Mayor Arturo Radaza, apan ang pagdili niya sa mga tricycle pagsubay sa national highway usa ka maayong lakang "

Ang tumong ni Lapu-Lapu City Mayor Arturo Radaza nga pagdili sa mga tricycles nga makapamasahero subay sa mga "busy" nga karsada sa maong dakbayan mahulagway nga maayo kay gitumong kini pagsulbad sa kahuot sa mga sakyanan.

Apan bisan sa kamaayo niini og tumong, maisip kini nga dakung sayop tungod kay naghinubra na ang gihimo sa mayor nga daw sa nanghilabot na siya sa kalihukan sa konseho sa Lapulapu.



Bisan ako, wala makagusto nga ang mga tricycles tugotan sa pagpamasahero ug pagsubay sa mga dagkong karsada - kana bang mga highways - kay makahatag sila og kalangan sa dagan sa ubang mga sakyanan.

Ang hinungdan niini mao nga ang mga tricycles nga magsubay diha sa mga highways daw sa "bao" nga nagkamang nga kon magsunod ka - pastilan maglagot ka tungod kay pwerteng hinaya nga modagan og makalangan lang sa atong biyahe.

Duna man g'yod unta'y kamandoan nga giisyu pa kaniadto sa Land Transportation Commission (karon Land Transportation Office) nga ang mga tricycles dili tugutan nga moagi sa mga highways, apan nagya-ya lang ning mga tigpatuman sa balaod.

Ang Lapu-Lapu City council dunay gimugna nga ordinansa kaniadtong 1997 nga nagbutang og "tricycle lane" kon dapit nga anha makaagi ang mga tricycles sa M.L. Quezon national highway ug ubang dapit sa Lapulapu.

Apan si Mayor Radaza miisyu og executive order kaniadtong miaging tuig nga kon imong sabton, ingon sa nagpahunong sa pagpatuman sa maong ordinansa. Gihimo kini ni Radaza dihang ang mga tricycles drivers miwelga isip protesta.

Ang protesta sa mga draybers gitumong sa paglangan-langan o kaha pagdumili sa kagamhanan sa Lapu-Lapu nga maaprobahan ang gipangayo nila nga umento sa pletehan sa mga tricycle nga nagpanawan sa maong dakbayan.

Misamot nga mitiyabaw ang mga tricycle drivers. Nagpatabang sila ni Ariel Lim, ang presidente sa National Confederation of Tricycle Operators and Drivers Associations of the Philippines.

Si Lim nangayo og legal opinyon sa Department of Interior and Local Government. Kini maoy hinungdan nga si DILG Secretary Reyes pinaagi sa iyang mga abogado, mipagawas og opinyon.

Ang gihimo ni Radaza maisip nga milapas na siya sa iyang katungdanan. Walay gahum ang mayor nga mousab sa ordinansa. Ang maka-repeal sa ordinansa nga gihimo sa konseho, mao ra usab ang konseho ug dili ang mayor.

"An ordinance of the sanggunian can only be repealed by a subsequent ordinance of that same sanggunian or by a direct act of Congress being the owner of the delegated power of legislation of the Sanggunian."

Ang maayong buhaton ni Radaza, awhagon niya ang mga suod niyang konsehal aron himoan og lakang nga dili na ipatuman ang city ordinance 299-97 nga nagmugna og tricycle lane diha sa Lapu-Lapu.

* * *

Mga pinili ra kuno nga sakop sa media - nagpasabot nga kadto rang mga sakop g'yod og mga media outlets - maoy giimbitar nga makatambong sa "get together" karong gabii diha sa Waterfront Hotel-Cebu.

Wala man god malilong nga duna'y uban nga magpatoo nga sakop sila sa media apan sakop ra diay og kahugpungan nga nagpatuo nga media.

Mao na ang giingon nga media nga walay medium. Wala sila magsibya og radyo, telebisyon ug wala usab magsuwat og mantalaan.