EDITORYAL - Plano sa kapolisan gihangop, apan...

Morag gipul-an na si Cebu Provincial Police Office Director Vicente Loot sa duha ka managribal nga fraternity kang kansang mga sakop kanunay'ng malambigit sa mga bayolenteng hitabo.

"Mibahad si Director Loot nga iyang ideklarar nga "criminal groups" ang maong duha ka fraternity -- ang Tau Gamma Phi ug Alpha Kappa Rho -- kun magpadayon ang ilang pagmugna og kasamok sa komunidad tali kanilang duha.

Sa nahibaw-an na sa kadaghanan init kaayo ang panagribal niining duha ka fraternity diin daghan nang kinabuhi ang nakalas. Daghan na usab ang nangaangol.

Daghan ang miuyon sa plano ni Director Loot. Gani suma pa sa pipila, "long delayed" na ang maong aksyon apan "better late than never."

Sama ni Loot, kining pipila nga mipadayag sa ilang suporta sa plano sa CPPO director gipul-an na usab sa mga bayolenteng diskarte niining duha ka frat.

Apan, sa among pagtan-aw, dili masayon ang pagdeklarar nga "criminal groups" niining duha ka fraternity.

Una sa tanan, wala angkona ning duha ka frat nga ilang sakop ang nalambigit sa pinusilay, bisan pa nga ang pipila niini miangkon sa ilang membership sa fraternity.

Ikaduha, kining duha ka frats mga chapter lang kini sa mother frats nila nga tua magbase gawas sa sugbo diin maayo ang mga rekord niini.

Ang labing maayong buhaton tingali mao ang pagsikop sa mga sakop niining maong mga frat sa higayon nga makabuhat og salaud. Ug pangitaon ug dakpon kadtong mga nalambigit sa krimen nga nagtagotago ning panahona.