Hukom ibaligya?

Dili maayo kining mitumaw nga mga tabi-tabi nga dunay labing minus duha ka justices diha sa Court of Appeals nga giingong nalambigit og binuang.

Ang binuang kuno mao nga modawat kini og kwarta isip bugti sa ihatag nga restraining order sa usa ka kaso. Bug-at kining maong pasangil ug maduhig niini ang ubang sakop sa Court of Appeals.

Mas maayo tingali nga ang presiding justice sa Court of Appeals o si Chief Justice Hilario Davide Jr. mopasusi gayod niining maong tabi-tabi. Apan mao lagi, bisan og kapila pa himoa ang imbistigasyon kon walay motestigos, wala g'yoy mahimo.

Ang epekto niini mao nga kon makasugat ka og mga associate justices sa Court of Appeals nga ania magbasi sa Sugbo, motumaw diha sa imong huna-huna ang katahap ug pagduda nga dili ba kaha ang imong gikaatubang mao ang gitumbok nga justice.

Ambot kinsa usab ang nagpalakaw niining maong mga tabi-tabi. Si Associate Justice Pampio Abarrintos nagduda nga ang maong tabi-tabi gipalakaw ra sa mga tawo nga wala mahimuot sa ilang hukom.

Posible sab nga tinuod ang pangagpas ni Justice Abarrintos. Sa usa god ka kaso, duna may makadaug ug duna sa'y mapilde. Kon ang mga mapilde dili makadawat sa hukom, mahimo man nga sila magduda nga nabayran ang huwes o mga justices.

Ambot, wala pa ako makahinabi sa ubang mga justices sa Court of Appeals nga ania magbase dinhi sa Sugbo kon unsay ilang huna-huna sa pamasangil nga dunay pipila kanila nga nagbinuang.

Sa interview sa DYLA kagahapon, si manlalaban Democrito Barcenas nga kanhi presidente sa Integrated Bar of the Philippines (IBP), mikonpirmar usab nga labing minus tulo ka huwes sa Regional Trial Court (RTC) mitug-an usab kaniya kabahin sa tabi-tabi.

Apan mao lagi, giangkon ni Barcenas nga lisud kaayo kini pamatud-an. Gawas lang kon kadtong naghimo sa pagpanuborno - kana kon tinuod man - mobarog ug motestigos sa kaso. Apan sigurado ko nga talawan pas nangamatay ang maong mga tawo.

Nasayod ko nga dili sila motoo sa giingon nga ayaw kahadlok sa pagtug-an sa matuod, bisan pa man ug sa paghimo nimo sa ingon, magkahulogan sa imong kamatayon.

* * *

Didto ko kagahapon sa firearms and explosives division sa Police Regional Office-7 ug akong nahibaw-an nga kapin na sa 2,300 ka tag-iya og dili lisensyado nga armas ang mipahimulos sa gitanyag nga amnesty.

Sayon ra kaayo ang pagpalisensya. Ang gikinahanglan nga dukomento mao ra ang papeles nga magmatuod nga ang nagpalisensya migamit gayod sa tinuod niya nga ngalan, unya ang kamatuoran kon asa siya magpuyo.

Ang tag-iya sa armas direkta nga mobayad og P2,000 adto sa Land Bank of the Philippines. Ang armas kuhaan og stencil sa iyang serial numbers o marka, dayon pabuthon alang sa ballistics samples.

Mao ra. Maghuwat na lang ang tag-iya kon kanus-a molusot ang iyang plastik nga lisensya. Ang iyang application, magsilbi nga temporary license niya kay ang armas iya man nga madala pagpauli.

Pangutana lang mo sa taga firearms and explosives division, mahimo usab ko ninyong tawgon. Ayaw lang sa text message kay kapoy na kaayo pagpasabot diha sa text.

Timan-i, ang amnesty matapos na karong Septembre 30.