Lainlain usab og estilo sa modus operandi ang mga isnatser. Ang usa sa labing bantayanan karon mao kining mga isnatser nga maoy paboritong biktimahon ang mga pasahero sa PUJ. Abtik kaayo kining mga tawhana.
Usa sa magbabasa niining ubos kong lindog mi-text kanako nga nagkanayon: "Naa lang koy i-share bahin niining snatching. Naay uban nga mokapyot sa jeep unya magpakaaron-ingnon nga konduktor. Diay, maniid sila sa mga pasahero. Kasagaran kining mga jeep nga may rota nga Inayawan-Colon, inig-abot na gani sa Carbon momenor man ang jeep. Lipoton dayon nila ang pasaherong makursonadahan og isnaton ang makursonadahan nilang butang niini." -- 0918-5494861
Wala iklaro sa atong texter kon siya ba mismo nabiktima na niining maong estilo sa modus operandi apan posibleng nakasaksi na siya og panghitabo nga ingon niini. Mao nga kon kamo magbiyahe, pagbantay gayod kanunay. Ayaw'g kompiyansa kon may mga tawo nga mokapyot sa jeep kay basin usa siya ka isnatser.
Kon mopahinay na gani ang driver sa pagpadagan sa sakyanan, pagbantay kamo kay mao na kana ang higayon nga mopasalir ang mga isnatser sa ilang tinonto. Anad na sila niining buhata busa sayon ra alang kanila ang pagpahigayon niini.
Ang akong ikasulti mao nga ayaw dayon pagtuo sa maong text. O labing maayo nga dili ka gayod motuo niini sa hingpit. Uso kaayo karon ang text scam. Daghan na ang nabiktima niini busa kon magpadala ka sa haylo, posibleng usa ka sa mahidugang sa listahan sa mga nabiktima sa mga badlongon sa katilingban.
Kon makadawat kamog text nga ingon niini, labing maayo nga papason ninyo kini dayon sa inbox sa inyong cellphone.
Sumbong ug reklamo? Text sa 0910-8105522)