Pamolitika sa PCSO

Malisud nang makapanubag sa iyang 'liability' si Staff Sgt. Richard Josol, kadtong badlungong sakop sa Presidential Security Group (PSG) nga nakadam-ag og duha ka sakyanan ug miangol og lima ka pasahero.

Gibalhin na siya sa iyang mother unit nga mao ang Philippine Marine Corps, sumala pa sa iyang labaw sa PSG dinhi sa Sugbo.

Kun mao na, asa man maningil kadtong lima ka pasahero nga na-ospital tungod sa kabuang ni Josol?

Ang Philippine Charity Sweepstakes Office (PCSO) ra ba mura'g dili makahatag og ayuda sa lima ka pasahero.

Aduna diay PCSO Board Resolution No. 272. Ning maong resolusyon, kadtong mga biktima sa disgrasya sa sakyanan nga nailhan ang drayber nga nakaingon sa disgrasya, dili mahatagan og ayuda.

Si Narissa Dacillo, social worker nga nadestino sa PCSO ug maoy gitahasan pag-screen sa mga buot mangayo og ayuda sa maong ahensiya sa kagamhanan, miklaro man nga kadto lang mga biktima sa hit-and-run nga sakyanan, mga aksidente nga walay matumbok nga suspek.

Kanang kaso sa lima ka pasahero klaro na kaayo kana nga dili makadawat og ayuda sa PCSO tungod kay nailhan man ang drayber nga nakaingon sa ilang pagkaangol - si Josol.

Bisan si Presidential Assistant for Central Visayas Felix Guanzon pa ang miinterbener, dili mahimong tuison ni Dacillo ang PCSO Board Resolution No. 272.

Kay nailhan man ang nakasala - si Josol - wala gyuy madawat gikan sa PCSO ang lima ka biktima.

Unsaon na lang? Gibalik pa gyud sa mother unit si Josol. Lisud na kaayo kining pangitaon. Impas tingale iyang liability!

* * *

PCSO. Human nako matuki dinhi ang aksidente nga naglambigit niadtong badlungong sakop sa PSG, dihay mitawag kanako nga reader sa Tikdol sa Pordoy ug mitug-an sa dautang 'practice' diha sa PCSO.

Ang caller mitug-an nga nakasinati siya og kaulaw diha sa PCSO sa dihang gibalibaran siya sa dihang nangayo og tabang tungod sa pagpa-opera sa tumor sa iyang igsuong babaye.

Kadtong caller lumad nga taga Negros Occidental, apan dugay na nga nagpuyo dinhi sa Sugbo tungod sa iyang pagpanarbaho isip guwardiya. Matud pa niya nga iyang gipaanhi iyang maguwang nga babaye gikan sa Negros tungod kay nag-antus kini sa sakit nga tumor (wala pud ko makapangutana asa nga dapit sa lawas mitubo ang tumor).

Dihay staff sa bangko nga gialagaran sa guwardiya nga nakatambag niyang dad-on sa PCSO iyang igsuon aron papangayuan og tabang aron madali ang pagpa-opera.

Pag-adto gyud nila sa PCSO, daling nakapamalibad ang kawani sa maong ahensiya kay lagi wala silay dala nga "referral" gikan sa usa ka politiko.

Ang guwardiya namalibad pag-ingong kuli siyang makakuha og referral kay wala man siyay kailang politiko. Apan gitambagan siyang magpatabang sa kapitan sa barangay asa sila nagpuyo aron makakuha og referral.

Tuod man miadto sila sa kapitan, apan igo lang usab nga gibalibaran kay ang iyang igsuon nga maoy nanginahanglan sa tabang, dili lumad nga taga siyudad sa Sugbo.

Naulaw intawon ang guwardiya sa iyang maguwang nga babaye nga miuli sa ilang lugar sa Negros nga wala gyud ka-operahi ang iyang tumor.

Ingon na ba niini ang Pilipinas? Dili kita makakuha sa benepisyo kun walay politikong mo-bak-ap nato?

Nganong pangayuan pa man og referral ang pasyente gikan sa politiko nga dili man doktor ang politiko nga makasulting tinuod diay kining masakiton ug nagkinahanglan og ayuda sa PCSO?

May pamolitika usab diay diha sa PCSO!

* * *

LECHON. Nakadungog ko og estorya nga naalitan kaayo ang mga tag-iya og lechonan sa Talisay tungod sa bag-ong patakaran sa maong siyudad nga did-an na sila sa pagpang-ihaw sa baboy nga ilang aslon diha sa ilang aslanan.

Gi-require na silang adto ihawon sa bag-ong abattoir nga gipadagan sa Talisay ang mga aslonong baboy.

Gisupak kini sa kahugpongan sa mga lechonan sa Talisay.

Una nilang rason, makahatag kini og kalangay sa impontong pag-ihaw sa mga baboy'ng aslonon. Ang resulta, dili na sila tempranong makahatod sa mga order kay maghulat-hulat pa man sila kanus-a maihaw ilang baboy sa abattoir sa Talisay nga limitado og mga mangingihaw.

Ikaduha, adunay dul-an sa 30 ka mga lechonan ang Talisay. Matag lechonan mi-empleyo og tulo ngadto sa lima ka mangingihaw. Sa ato pa, dul-an sa usa ka gatus ka mga mangingihaw ang mawad-an og trabaho kun ipatuman sa Talisay ang pagpa-ihaw sa mga aslonong baboy ngadto sa ilang ihawan.

Naabot sa hunahuna sa mga opisyal sa Talisay kining maong palisiya tungod kay giabot og dakong alkanse ang ilang ihawan. Naglisud sila pagbayad sa binulang utang sa loan pagpabarug nianang ihawan.

Apan kun ipamugos sa kagamhanan sa Talisay, maapektahan ang operasyon sa mga lechonan sa Talisay.

Madaot ang garbo sa Talisay nga mao ang inasal.