Oil depot pikitan

Husto ang sugyot nga ang mga pundohanan og petroleum products sa mga oil companies maoy angay'ng pikitan sa mga drayber kon mohimo sila og protesta sa kanunay'ng pag-usbaw sa presyo sa gasolina.

Kon ang mga drayber god mohimo og protesta pinaagi sa paglusad og transport strike, ang maapektahan intawon mao ang mga sumasakay, ilabi na kadtong mga walay sakyanan.

Kining maong sugyot nagagikan ni Koronel Benjamin "Benjie" Yu, ang kanhi chairman sa City Transport Services Cooperative (Citrasco) nga bag-ohay lang gitudlo ni Presidente Arroyo isip administrator sa Cooperative Development Authority.

Sa ato pa, kon si Yu ang pagbut-on, dakung sayop ang paglusad og transport strike sa mga PUJ drivers karong adlawa kay giisip niya kini nga paghasol-hasol sa mga sumasakay.

Sa akong bahin, sayop g'yod tinuod nga ang protesta ipaagi sa transport strike kay ang kanunay'ng pagsaka sa presyo sa mga petroleum products nahimo tungod sa Oil Deregulation Law.

Sa wala pa god mugnaa ang maong balaod, ang mga oil companies dili makabasta-basta sa pagpasaka sa presyo sa ilang produkto kon walay public hearing nga ipahigayon.

Apan karon, ang mga oil companies na maoy magbuot kon kanus-a sila mopausbaw sa presyo sa ilang baligya ug kon pila ang kantidad.

Ang maayong buhaton lagi mao ang paghimo og hiniusa nga lakang aron awhagon ang mga magbabalaod nga ilang wad-on ang Oil Deregulation Law. Kini aron nga dili na makabasta-basta sa pagpausbaw ang mga oil companies sa presyo sa ilang mga produkto.

Makapangawot ka g'yod hinoon sa dili katol kon mopalit ka na og gasolina ug ubang petroleum products. Grabe na kaayo kamahal kay bisan ang diesel kon krudo, miabot na og kapin sa P32 ang litro.

Balik sa pagpahigayon og transport strike, kataw-an ra sa kagamhanan ang ilusad nga welga sa mga drayber nga molungtad lang og tunga sa adlaw o usa ka adlaw.

Pareho karong adlawa, gikareport nga ang welga ila rang himoon gikan sa buntag hangtud sa udto. Paminaw hinoon nako maihap ra sa tudlo ang mosalmot aning maong kalihukan.

Bi, kamong mga drayber, suwayi kuno ninyo og welga bali'g usa lang ka semana. Pinaagi ana, mabatyagan na sa kagamhanan ang inyong sentimento.

* * *

Congratulations diay sa DYLA news team kay sila gihapon maoy miguwa nga mananaug sa indigay sa mga presentasyon atol sa News and Public Affairs nights kaniadtong Sabado.

Miabot lang og duha ka minuto ug 58 segundos ang ilang pasundayag nga ang tema nag-awhag og kahiusahan sa mga brodkasters aron nga ang katawhan nga "uhaw" sa mga inpormasyon ilang maserbisyohan.

Ang laing hudyaka sa media karon na sab nga Dominggo sa pagbukas sa Press Freedom week. Karong sumad Lunes, ang JY Gonzalez and Partners nga gidumala ni Pare Jonjie ug Rhoda Gonzalez, uban sa Globe Telecom, motanyag og makahubong nga dinner sa mga sakop sa media.

Gawas nga makabuhong ang ihatag nila nga dinner, adto pa g'yod ipahigayon sa Waterfront Hotel-Cebu. Unya, inika petsa Septembre 24, ang pagtak-op sa Press Freedom week wala pay klarong venue.