50 nay edad

Karong panahona midagsang na pag-ayo ang mga badlongon sa katilingban nga walay laing gitinguha kondili ang pagpamentaha ug paghatag og kahasol sa ilang isigkatawo. Usa sa gitumbok nga hinungdan niini mao ang kalisod ug sa ka-walay masudlan nga trabaho. Kini (kuno) ang hinungdan nga midangop sila sa buhat nga daotan ug makapuling sa mga mata sa mabuot nga katilingban.

Pero para nako taphaw ra ang maong katarongan. Para kanako, ang daotan nilang buhat--sama sa pagpanulis, panglabni ug panguot--maoy nakapahimo nilang walay trabaho tungod kay kini man ang ilang trabaho. Wala silay tarong nga trabaho tungod kay ang daotan man nga trabaho ang ilang gisudlan.

Sama niining mga mangunguot nga midagsang na pag-ayo karon sa dakbayan sa Sugbo. Kaniadto pa kining problemaha. Ug karon nagkagrabe na gayod. Sa bisan asang dapit ka siyudad mahisum-ok, magpanglingi ka na sa matag karon ug unya sa imong luyo aron pagsuta kon wala bay tawong kadudahan og lihok nga nagsunod o nagpaduol kanimo. Mabalaka ka nga basin mangunguot ang maong tawo.

Sumala sa sumbong nga akong nadawat, dili lang kay mga batan-on ray misalga sa modus operandi sa panguot karong panahona kondili lakip na kadtong mga edaran na. Aduna ganiy mangunguot nga mga 50 nay edad.

Kining maong kasayoran akong nakuha gikan sa usa ka magbabasa nga mi-text kanako nga nagkanayon: "Good day, Sir. I read your column Modus everyday. Please don't publish my number. Naa lang koy isumbong nimo. Bahin kini sa akong nasaksihan nga panguot sulod sa usa ka jeepney (Agosto 2), 2005. Ang PUJ padulong sa Talamban. Abi nimo, Sir, ang mangunguot tiguwang na gyod, mga 50 ang edad, lalaki. May kuyog siyang laing lalaki. Ang estilo sa ilang modus mao nga magdala sila og dako nga knapsack pero klaro kaayo nga wala kiniy sulod. Iyang ibutang ang maong bag sa iyang paa. Pinaagi niini, iyang matabonan ang iyang usa ka kamot nga maoy gamiton sa pagpanguot. Ang iyang kauban mohulog og sensilyo." -- 0917-withheld.

Sakaop diay sa "Laglag Barya Gang" kining maong mga mangunguot. Pero lahi pod ang ilang estilo kay magdala man og dakong bag nga walay sulod. Mga edaran na usab ang mga suspek. Lahi sa ubang sakop sa "Laglag Barya Gang" nga mga batan-on pa.

Pagbantay kamo niini. Ang mangunguot anaa sa bisan asang dapit. Pero partikular ninyong bantayan kon mosakay kamog PUJ paingon sa Talamban ug unya adunay mosakay niini nga duha ka tawo nga mga 50 nay edad ug ang usa magdalag bag kay basin mao na kana ang salbahis nga mangunguot.

Karong panahona, kinahanglang magbantay ug maniid kita sa lihok sa atong katupad sa pagsakay og PUJ aron dili mabiktima sa panguot.

(Sumbong ug reklamo? Text sa 0910-8105522)