Mea culpa ni Martinez

Way kalainan si kongresista Clavel Asas Martinez sa tawo nga nangluwa paingon sa taas nga nanghilam-os sa iyang kaugalingong luwa sa dihang mihimo kini og privilege speech sa hawanan sa Kongreso niadtong Lunes sa wala pa nila botahi ug ihawa ang impeachment complaint.

Kini tungod kay sa iyang tantong paningkamot nga mapiit si Presidente Gloria Macapagal Arroyo wa niyang mamatikdi nga ang mga impormasyon nga iyang gibulgar inanay nga miabli sa kaban sa kaugalingon niyang tinaguan.

Inay iduot ang presidente daw sa naggisal si Martinez sa iyang kaugalingong mantika tungod kay wa makaprobar sa ilang mga pamasangil batok ni Arroyo ang iyang pamahayag. Hinuon boluntaryo niyang gitug-an sa way paghago sa iyang mga kaatbang sa politika ang ilang lakang pagpaniobra sa resulta sa eleksiyon dinhi sa Sugbo.

Kinsa kahay mas tikasan ug angayang tangtangon sa pwesto sa pagkakaron human sa iyang gitug-an? Ang presidente o si Martinez nga miangkong misuborno siya og P2 milyones alang sa mga opisyal sa Lakas didto sa Manila aron "I-arrange" ang election protest sa iyang bana batok ni Gobernador Gwendolyn Garcia.

Kon way laing tumong ang kampo sa mga Martinez gawas sa pagpangita sa kamatuoran kon wa ba sila tikasi sa miaging eleksiyon nganong agrisibo ug yano lang kaayo silang mibayad sa maong kantidad. Timan-i nga ang P2 milyones katunga lang sa ilang gisabutan nga P4 milyones aron lang paghikay sa election protest.

Imposibli sab tingali nga modagan og ingon niini kadako ang magasto sa pagsang-at og protesta kon limpyo ug pinasubay lang gyud sa balaud ang ilang gihimo. Di kahang ang maong salapi bayad sa pagmaniobra sa resulta sa eleksiyon aron paburan ang protesta sa iyang bana?

Dunay igong rason ang kampo nilang Gobernador Garcia nga mabalaka ug magduda nga duna gyuy lakang ang mga Martinez pag-usab sa resulta sa eleksiyon dinhi sa Sugbo. Kabahin na kaha sa maong lakang ang pagpangahanaw sa mga kandado sa mga balota didto sa lungsod sa Tabogon ug sa pagpangguba sa mga silyo niini?

Sa maka-usa pa di kini imposibli tungod kay kontrolado sa mga Martinez ang ilang distrito diin ang Tabagon kabahin niini.

* * *

[email protected]