Ang pagbasura sa impeachment complaint kun committee report mao na hinuoy misugnod sa mas dako pang problemang politikal.
"Makapaabot ang nasud og mas dako pang kagubot human sa giingong kamatayon sa impeachment complaint," matud pa sa usa ka kongresista.
Dunay basihanan ang giingon niining maong kongresista. Kay ang pundok ni kanhi Presidente Cory Aquino nakig-alayon na sa political opposition ug sa mga cause-oriented group lakip na ang mga walhong organisasyon.
Misaad ni Cory ug ang iyang bag-ong mga kasusyo nga magpadayon ang mga rali protesta batok ni Presidente Arroyo hangtud nga ang Pangulo mapugos sa pagbuhi sa katungdanan nga iyang gikuptan.
Sa ato pa, magpadayon ang kagubot sa kadalanan. Ug magpadayon usab ang paglabad sa ulo sa mga negosyante ug investor kun sila magpadayon pa sa ilang pagbubo sa puhonon sa Pilipinas.
Ang awhag ni Arsobispo sa Sugbo Ricardo Cardinal Vidal nga mag-ampo sud sa mga simbahan imbes maghimog kasamok sa kadalanan mao untay maayong buhaton.
Ang Cardinal mipadayag sa iyang kasagmuyo tali sa pagbasura sa impeachment complaint apan wala siya mahiuyon sa desisyon sa mga lider sa oposisyon sa pagdala sa ilang reklamo sa karsada.
Mas makaayo tingali alang sa nasud kon maminaw kita sa awhag ug sugyot sa atong Cardinal.