EDITORYAL - Grabeng solusyon sa grabeng problema

Mga 20 ka government service retirees nagkatigum adtong miaging semana sa usa ka kan-anan diin gipahigayon ang salo-salo alang sa birthday sa usa kanila.

Atol sa maong panagtigum, ang mga retirees kinsa nagpangidaron na og 75 ngadtos 85 nagbinayloay og mga hunahuna kalabot sa kahimtang sa nasud karon.

Silang tanan nagkauyon nga grabe na gyud ang problema nga giatubang sa atong nasud.

"Korupsyon dinhi korupsyon didto, matud sa usa ka retiree. "Way puas ang kinawatay gikan sa ubos ngadto sa taas."

"Ug ang nakaparat pa gyud niini mao nga kining mga kawatan ... mga corrupt officials ... wala gyud tugki'g kauwaw bisan pa sa hapit adlaw-adlaw nga lampurnas kanila sa media," suma pa sa lain retiree.

Usa kanila nangutana: "Unsa may maayong buhaton aron mapapha kining makauuwaw nga korupsyon sa atong nasud?"

"Di na ni matabang," tubag sa usa. "Bisag unsaon di na ni mapapha ang pagkakurap sa daghang mga opisyal sa gobyerno."

"Matabang pa kini, uy," matud pa sa labing tiguwang sa grupo. "Atong hangyuon ang Ginoo nga ipa-unlod ang yutang Pilipinas og usa lang ka adlaw ug pagkahuman iya nasang ibalik ibabaw sa tubig ang nasud. Seguradong 'matawo' ang bag-ong Pilipinas."

Grabeng solusyon ang gipadayag ning atong retirado apan kinsa ba kadtong nag-ingon: "A serious problem needs a serious solusyon."