Taphaw'ng pagtuon

Tungod sa pasangil sa ilang pagdawat og makabungog nga honorarium gikan sa gitagud-tagod nga subjects sa evening program, ang mga opisyal sa Cebu State College of Science and Technology (CSCST) gikatahong nagplano sa pagpapas na lang sa evening classes. Kon mahinayon, peligrong maputol ang pag-eskuyla sa kapin sa 3,000 ka mga tinun-an. Ug ang gipasangil nga pangurakot nilang CSCST President Jose Sal Tan ug kaubanan madugangan sa bangis nga krimen pagluba sa kaugmaon sa inosenteng mga batan-on.

Way nagkuwestiyon sa evening classes sa CSCST. Gawas nga nakatabang ni sa mga tinun-an nga di maka-eskuyla sa adlaw, nakahatag pa gyod og dugang kinitaan sa mga magtutudlo. Ang dakong balikas mao ang pagpahimus sa mga opisyal sa eskuylahan pagpuno sa ilang bolsa og hangtod tag P125,000 kada buwan nga honoraria sa way pagserbisyo bisan usa ka gutlo sa subjects nga gibuakbuak og ka-28 ka higayon.

* * *

Gibasura na sa Department of Budget and Management (DBM) ug Commission on Audit (COA) ang pangugat sa mga opisyal sa CSCST nga legal ang ilang pagdawat og honoraria nga mas dako pa kay sa ilang naandang suholan:
•Si Direktor Carmela S. Fernan sa DBM 7 niingon nga ang non-teaching personnel di mahimong modawat og honorarium segun sa Budget Circular No. 2003-5;

•Sa iyang bahin, si Sonia L. Dejacto, Audit Team Leader sa CSCST, human sawaya sa giingong kapakyas pagbadlong sa binuang nilang Tan ug kaubanan, nisaad pag-disallow sa honoraria sa teaching personnel nga giapil sa evening program bisan way aktuwal nga teaching loads;

• Ang bisan unsang honoraria nga ihatag kinahanglang di molapas sa P20,000 kada buwan, segun sa Administrative Order No. 103; ug

•Di makakobrang mga opisyal ug mga kawani sa CSCST og overtime pay, kon mo-serbisyo silag lapas sa walo ka oras, bayran sila pinaagi sa dugang time/days off sa trabaho.

* * *

Nisaad si Cebu City Councilor Nestor Archival, chairman sa Environment Committee sa Cebu City Council, nga isumiter ngadto sa Visayas Ombudsman ang tanang dokumento nga nahipos sa iyang komitiba labot sa kontrobersiyal nga pagpamalit og kemikal batok sa dengue. Pero nanghunaw siyang daan sa kuwestiyonableng mga aspeto sa transaksiyon:
• Nganong Aqua-Resigen (permethrin ang generic name) ang gipangayo sa City Health ug giaprobahan sa City Council, pero lambdacyhalothrin (generic name sa MaxiFog) man ang aktuwal nga gikompra sa syudad;

•Kon ang gitun-an sa komitiba ni Archival mao ra ang Aqua-Resigen, nga brand name sa Bayer Philippines, unsaon pa man pagsud sa laing water-based chemicals nga hinimo sa karibal nga mga kompaniya; ug

•Tinuod ba nga ang pagtuon sa komitiba gibase lang sa Material Safety Data Sheet (MSDS) sa Aqua-Resigen nga, palihug panggunit mo sa lingkoranan, hinatag ra sab sa supplier?

* * *

Email: leo_lastimosa@abs-cbn.com