Loot mibalik na

Nalipay ko sa labing ulahing kalamboan sa kapolisan dinhi sa Sugbo, apil na diha sa Police Regional Office-7.

Nabalik na sa karaan niyang pwesto pagka provincial director sa kapolisan sa Sugbo si Koronel Vicente "Vic" Loot sugod kagahapon sa hapon.

Unsay buot ipasabot niini? Nagpasabot kini nga masumpo na usab ang pagkuyanap sa mga illegal nga sugal diha sa kalungsuran, sama sa masyaw ug video karera, nga pwerteng pagkuyanap diha sa probinsya kay wala kaayo matagad sa kanhi provincial direktor.

Si Koronel Drusillo Bolodo, ang kanhi provincial police director, gihatagan hinoon og mas taas nga katungdanan isip chief of directorial staffs. Ang maong katungdanan, mas labaw pa sa provincial direktor.

Unya, ang amigo nako nga si Koronel Lani-O Nerez maoy gitudlo nga bag-ong Deputy Regional Director for Operations, samtang si Koronel Ronald Roderos mao na ang bag-ong Deputy Regional Director for Administration.

Nakaingon ko nga nalipay ko sa pagbalik ni Loot kay nasuheto ko sa iyang batasan nga molihok g'yod. Dili na lang nato dugangan pa ang pagsaway nato sa kahinay ni Bolodo sa paghimo og aksyon sa mga illegal nga sugal sa probinsya.

Ako siya nga klarohan nga walay personalan kining ako kanimo Kernel Bolodo. Karong anaa ka na diha sa laing pwesto, dili na ikaw mahimong "topic" sa atong lindog gawas lang kon malambigit ka og laing kontrobersyal nga isyu sa umaabot nga adlaw.

Duna man go'y opisyal sa CPPO nga mitug-an nako nga si Koronel Bolodo kuno nagtoo g'yod nga personalan ang akong walay hunong pagsaway kaniya. Diha siya masayop.

Natandi lang nako nga atol sa pipila ka buwan nga pag-asumier ni Loot pagka provincial direktor, napiangan niya ang illegal nga sugal sa kalungsuran. Nagtoo ko nga karon nga mibalik na si Loot sa pwesto, ipadayon na niya ang naputol niyang kampanya.

Unya, kadtong mga hepe sa kapolisan nga magligoy-ligoy, aw sigurado nga makatagamtam og silot. Welcome back Colonel Loot!

* * *

Nagka-alegri ang away nila ni assistant city prosecutor Mary Ann Castro ug magpapatigayon Jake Yu.

Nagbawos-bawos sa pagkihaay silang duha. Niadtong miaging duha na ka semana, si Castro nasakpan nga milangkat sa hulagway ni Yu nga didto gipapilit sa iyang bail application.

Giuli ni Castro ang nag-side view nga hulagway ni Yu, apan namalibad nga wala kaniya ang atubangan. Apan ang huwes nagtoo g'yod nga si Castro ang responsable sa pagkahanaw sa front view picture ni Yu.

Gipamulta sa huwes si Castro. Karon misamot ang problema ug kasikat ni Castro kay gipasakaan na usab siya ni Yu og kasong kriminal ug administratiba.

Ang kaso nga administratiba didto gipasaka sa Ombudsman ug ang kaso nga kriminal, didto gipasaka sa fiskaliya.

Giangkon ni Yu nga nabalaka na siya karon nga nagtinguha kaniya og dautan si Castro. Duna kuno'y mga tawo nga nabantayan ni Yu nga magpa-antaw sa ilang panimalay ug si Castro nakit-an usab nga didto sa maong dapit kaniadtong Agosto 10.