Sample sa bugas

Makadaghan na kita maghisgot dinhi ning maong lindog mahitungod sa modus operandi sa mga badlongon sa katilingban nga ang gihimong medyum sa ilang tinonto mao ang bugas. Apan daghan pa diay kitag angay mahibaloan nga mga tinonto mahitungod niini. Usa na niini kining atong hisgotan karon.

Mga suki, adunay mga mangingilad nga motaak sa lainlaing dapit aron sa pagpangilad. Mosum-ok sila sa mga lugar sama sa kalungsoran ug kabarangayan nga walay nakaila kanila. Magpaila sila nga dealer og bugas.

Maoy kasagaran nga ig-on niining mga tawhana ang mga tindahan. Ang estilo mao nga magdala silag sampol sa bugas nga nindot kaayog klase. Ilang ipakita ang maong sample ngadto sa ilang prospective victim. Madani usab ang mga negosyante sa bugas nga ila kunohay nga gibaligya tungod kay primera klase man lagi apan ila lamang itugot sa ubos kaayong presyo.

Mao nga magkasinabot na kunohay sila. Moorder ang ilang prospek og bugas, depende kon pila ka sako ang buot niining paliton. Mangayo dayon og downpayment ang mga suspek nga katunga sa katibuk-ang kantidad sa orderon nga bugas. Mangatarongan sila nga sineguro ang ila kay basin dili paliton og dayon ang giorder nga bugas kon ila na kining ika-deliver. Mao nga aron maseguro ang pinalitay, mangayo silag downpayment.

Tungod lagi kay misalig sa kaligdong ug nadala na sa estorya sa mga suspek, ang negosyante mosanong sa paghatag sa gipangayo nga downpayment. Human madawat ang kantidad, moisyu ang mga suspek og temporary receipt alang sa kuwartang nadawat isip downpayment.

Sa higayon nga anaa na sa mga suspek ang kantidad, mopasalig sila nga niana dayong adlawa ipa-deliver nila ang bugas. Ang temporary receipt nga ilang giisyu mao lang kunoy ipakita ngadto sa mag-deliver sa bugas aron pagmatuod nga nakabayad na sila sa downpayment.

Tuod man, magpaabot ang prospek sa pag-deliver sa bugas nga iyang giorder. Apan kabawo lang ang iyang maani. Moabot na laing ang gabii hangtod nga moabot ang lain na usab nga adlaw, wala gayod moabot ang giorder niyang sinakong bugas. Ulahi na siyang makaamgo nga nailad diay siya.

Ang tinuod kadtong mga tawo nga nakig-negotiate kaniya mga mangingilad. Dili sila matuod nga negosyante. Sagad duha ngadto sa tulo sila ka tawo. May nabiktima na niini sa dakbayan sa Mandaue. Angay kamong magbantay niini kay tingalig kamo ang sunod nga mabiktima sa ilang modus operandi.

Maayong mobulatik kining mga tawhana mao nga daghan gayod ang motuo, mosalig ug madala sa ilang estorya.

(Sumbong ug reklamo? Text sa 0910-8105522)