Magdaginot ta's kuwarta

Sa dili pa ipahigayon ang usa ka public hearing sa mga balaudnon nga gitumong aron sa pagmugna og dugang tulo ka probinsya sa Sugbo, angay nga tun-an gayod pag-ayo sa mga sakop sa House Committee on Local Governments kon natuman ba ang tanang gikinahanglan.

Una mao ang gidaghanon sa mga lumulopyo ug ang gidak-on sa luna niadtong dapit nga gustong ma-convert ang ilang lugar isip pagka buwag nga probinsya.

Angay'ng tin-awon pag-ayo ang kabahin sa isyu nga gipasabot sa usa ka mayor dinhi sa Sugbo mahitungod sa "real residents" ug "legal residents."

Ang real residents kuno mao ang mga tawo nga nagpuyo g'yod sa maong lugar sulod sa taud-taod nang panahon, unya ang legal residents mao kadtong temporaryo lang nga nagpuyo kay anaa man mahimutang ang ilang gitrabahoan.

Magamit ba kining mga legal residents aron ma-justify nila ang gidaghanon sa mga lumulopyo nga gikanahanglan sa usa ka dapit nga nagtinguha nga mahimong probinsya?

Basin og human unya sa pagpahigayon sa public hearing, mahibaw-an na lang nga wala diay matuman ang gikinahanglan nga mga dukomento, usik na ang gasto ug kahago sa mga magbabalaod.

Dili masayon ang gasto sa kagamhanan pagpahigayon og public hearing. Sigurado man g'yod nga ang plete sa mga kongresista ug ilang staff pag-anhi sa Sugbo, ang pag-estar sa mga hotel, pagkaon, ang kagamhanan maoy ilang paabagahon.

Unya, awhagon nato ang komitiba nga gidumala ni Kongresista Emilio Macias nga kinahanglang mohimo gayod sila og public hearing anhi sa Sugbo kabahin sa gisugyot nga pagmugna og dugang tulo ka probinsya.

Kon may public hearing na, kinahanglan nga mopadayag gayod og baruganan ang mga Sugboanon. Hinoon, pipila ra ang mahatagan og higayon nga makasulti sa public hearing.

Mas maayo nga kamong naa sa probinsya, maghuna-huna na lang kon unsay inyong sentimento. Kay kon dunay plebisito, mobotar man gayod kamo kon uyon o supak ba kamo sa pagmugna og dugang probinsya sa Sugbo.

Makaayo ba kaninyo o dili ang pagmugna og dugang probinsya? Paminaw pag-ayo sa mga presentasyon sa pikas ug pikas. Human nimo mabati ang pagpasabot sa duha ka bahin, anha ka pa mohatag sa imong kaugalingong baruganan.

* * *

Hapit na diay ang Broadcaster's Month. Pagahimuon kini karong buwan sa Septembre diin ang mga kawani sa lainlaing TV ug radio stations mosaulog sa tibuok buwan nga kalihukan.

Apil ning maong mga kalihukan ang pagpahigayon og indigay sa pasundayag sa matag sabado. Kon walay kausaban, ang unang Sabado sa buwan ipahinungod sa mga sakop sa news and public affairs.

Karong tuiga, depensahan namo ang among bakus pagka kampyon sa mga pasundayag sa News and Public Affairs Night. Kon makadaug mi sa DYLA, daku kaayo namong garbo kay pila ra god kami nga sakop kon itandi sa mga kawani sa dagkong networks.

Apan bisan sa among kagamay, magpakatakus na usab kami sa pagpakigsakbang sa mga tang-an na nga magsisibya.