Bakasyonista

Usa ka langyaw miadto sa usa ka mamingaw'ng dapit aron magbakasyon gikan sa makabungog nga trabaho sa kompaniya nga iyang gialagaran isip manedyer niini. TUngod sa sugyot sa doctor nga mogahin gayud siya og balig usa ka buwang pahuway mao nga napadpad siya ning dapita. Sa maong dapit usab nahimutang ang usa ka payag diin nagpuyo ang nag-inusarang monghe. Nabantog ang maong monghe nga usa ka maalamon, maampuon, og ligdong nga tawo. Nadungog nga daghan ang moduaw sa maong monghe aron magpakitambag og si bisan kinsa nga moduaw kaniya, makapupo gayud og mga pagtulon-an. Busa naikag ang maong langyaw nga moduaw usab sa nahisgutang monghe. Tuod man, sa dihang nahiabot na siya sa payag niini, gisugat dayon siya sa usa ka muboon og yagpison nga tiguwang. Malipayon kining misugat kaniya. "Dayon, higala! Gikalipay Ko Kaayo ang imong Pag-anhi!" Matud pa niini nga mapahiyumon. Sa dihang misulod na sila sa payag niini, nakita sa langyaw kon unsa ka hawan sa maong payag. Walay ni bisan unsa nga dekorasyon ni mga mahalong mga butang. Dili sama sa iyang apartment nga puno kaayo sa mga mahalong furniture, appliances og uban pang himan. Sa maong payag, makita ang duha ka buok silya, usa ka lamesa, katre, altar nga dunay duha ka buok kandila, pipila ka buok libro og wala na. Busa nangutana ang langyaw ngadto sa monghe. "Padre, dugay ka na ba dinhi nagpuyo? Mitubag ang monghe. "Mga kalim-an na ka tuig higala. "Nganong sulod sa maong kadugayon, daw sa hawan man kaayo ang imong pinuy-anan?" unya misumbalik ang monghe og pangutana. "Ikaw higala, asa man ang imong mga gamit?" Mapagarbuhon ang langyaw nga mitubag. "Daghan ko og mga gamit, apan ako lang gibilin sa akong apartment kay Bakasyonista ra man ko dinhi." Husto ka, mao nga wala kaayo sab ko magpondar og daghang kabtangan, kay sama kanimo ako bakasyonista usab ning maong dapita. Inig-abot na unya sa tukmang higayon, ako mobalik diin ako gikan nga walay bisan sentimo ni saput nga madala!"

PAMALANDONG

Walay ni bisan kinsa nato ang molungtad ning maong kalibutan. Moabot ang higayon nga mamatay kita og ang atong lawas mamahimong abog og ang atong kabtangan atong mabiyaan. Dili dautan ang pagbaton og kabtangan apan ang pangutana mao. "Naulipon ka ba nila og imo ba silang gipaka-dios?" Kay mag-unsa man ning tanang butang kon mapukan ang imong kalag?