EDITORYAL – Pro-Sugbuak gilubong sa survey

Maayong pagkalubong sa pro-Sugbuak tali sa anti-Sugbuak sa plebisito nga gihimo sa Archdiocese of Cebu sa mga parokya niini sa tibuok lalawigan sa Sugbo.

Bisan pa gani sa mga distrito kun mga balwarte sa mga kongresista nga miproponer nga buak-buakon ang Sugbo ngadto sa upat ka probinsiya, ang pro-Sugbuak gibiyaan sa anti-Sugbuak og dakong mayoriya.

Didto pananglitan sa lunsod sa Argao, ang hometown ni Kongresista Simeon Kintanar kinsa buot nga himuon ang iyang distrito nga probinsiya sa Cebu del Sur, 30 lang ka parishioners ang nipabor sa bill ni Kintanar samtang 931 ang mibotar og "No."

Sa Pinamungahan lugar ni Kongresista Antonio Yapha kinsa naninguha nga mahimong lalawigan sa Cebu Occidental ang iyang distrito, ang pro-Sugbuak nakakuhag 145 lang nga pabor sa total botantes nga 1,149. Gilubong tagaliog.

Sikit hinuon ang resulta sa Bogo, balwarte ni Kongresista Clavel Martinez, diin ang pro-Sugbuak nakakuhag 265 kontra 395 sa anti-Sugbuak. Pero pilde gihapon.

Si Cebu Archbishop Ricardo Cardinal Vidal kinsa maoy nagpasiugda sa maong plebisito sa mga parokya nagkanayon nga partial (mga 51.44 percent) pa kining resulta nga atong gihisgutan. Ang survey gipaabot nga mahuman unya sa Agosto 28.

Ang maong resulta mipakita nga ang mga Sugbuanon dili gayud gusto nga buak-buakon ang probinsiya sa Sugbo. Ug kon duna pa gyuy mas halapad – o provincewide – nga survey nga himuon, walay duda nga mas dako pa gyung lunop ang madangatan sa pro-Sugbuak.