'Cell ko mahal ko'

Mga suki, nia pa gyoy laing modus operandi sa text scam nga angay ninyong bantayan. Sa kadaghan sa text scam nga atong gibulgar dinhi niining ubos tang lindog, nia pa gyod diay lain nga wala pa mabuking.

Ang estilo mao nga sama sa ubang text scam, padad-an ka og congratulatory message. Ang magpadala kanimog text magpaila nga usa ka abogado ug representante sa usa ka charity foundation.

Pinaagi sa text, iya ka nga pasabton nga ang ilang foundation nagsaulog dili pa lang dugay sa ilang ika-pila ba kaha nga anibersaryo. Basta ingon niini kanunay ang pasangil aron paglingla sa ilang isigkatawo.

Patuohon nila ang ilang prospect nga atol sa ilang anibersaryo, gikauyonan sa mga opisyal sa ilang foundation nga manghatag silag dinagkong pahalipay ngadto sa mga tawo nga nagbaton og cellphone.

Patuohon sab nila ang prospect nga nakuha nila ang number niini sa internet. Ambot kon unsa kini ka tinuod. Basta mao kini ang kanunay nilang ipangatarongan. Giapil (kuno) nila ang imong numero isip entry sa ilang anniversary draw ug maoy nahulbotan nga makadaog og P890,000.

Kuwartang malabo kon tinuod pa. Ang nakaparat lang kay usa man lang lagi kini ka matang sa pangilad. Ang ilang gipatuo nga nakadaog mao na hinuon ang ilang makuwartahan. Kay kon magpakitag interes ang prospect pag-claim sa premyo, ila dayon kining pangayoan og dakong kantidad isip processing fee (kuno).

Ang maong matang sa pangilad gitawag nila og "Cell Ko Mahal Ko" raffle promo. Pagbantay kamo niini. Maayo ra ba gayod silang mokombinser og tawo. Pangayoan pa nilag photocopy sa sedula, police clearance ug ID ang prospect aron gayod mosalig kinig maayo kanila ug mohatag sa kantidad nga ilang pangayoon. Pastilan...!

Pagbantay kamo niini...!

* * *

Niadtong Hulyo 21, 2005 (10:15;21), nakadawat kog text gikan sa usa ka magbabasa nga nag-ingon: "Modus sa BBRC. Ang bugas nga lutoon para sa mga priso gibaligya ngadto sa mga priso. Mopalit na lang ang mga priso kay gamay ra man ang ihatag unya hilaw ug lata pa gyod."-- 0927-5719815

Dako kining binuang kon tinuod man ugaling kini. In fairness sab ngadto sa mga tagdumala sa BBRC, atong klarohon nga wala kita motuo niining maong sumbong. Apan mas maayo nga masusi kon unsa kini ka tinuod. Maayong maklaro ang tanan.

Bukas sab kining lindog alang sa tubag sa mga tagdumala sa taga BBRC aron sila makapasabot sa ilang habig. Aron ba mapapas ang pagduda sa mga tawo sa inyong kaligdong sa pagtuman sa inyong mga katungdanan. Mas maayo gayod nga matubag kining maong sumbong ug reklamo sa usa ka texter.

* * *

(Sumbong ug reklamo? Text sa 0910-8105522)