EDITORYAL - Bisan pa sa vigilantes

Si Bise Mayor Michael Rama gikutlo sa usa ka reporter nga nag-ingon nga ang siyudad sa Sugbo dili usa ka "livable city" sukwahi sa gikataho di pa lang dugay.

Gibase sa bise mayor ang iyang opinyon sa giingong vigilantes kinsa maoy gidudahang tigpanumba sa mga tawo nga wala nila kahiuyoni. Mohapit nag 90 ka tawo ang gipamatay dinhi sa siyudad ug kining mga vigilante maoy gipasanginlan.

Tungod niining nagpadayon sa pagpanumba og mga tawong wala hiuyoni sa mga vigilante, ang titulo nga "livable city" dili gyud tinuod angayng ihatag sa atong siyudad.

Apan dili ra man tingali mao kini ang basihan sa pagpili og usa ka "livable city." Naa pay uban basihanan.

Ang dakong pag-uswag sa Sugbo sa natad sa ekonomiya diin midala og kalambuan sa negosyo, edukasyon, kalingawan, transportasyon ug uban pang butang nga nakahatag og kasayon sa kinabuhi sa mga lungsuranon basihanan usab kini sa pagpili og "livable city."

Hayan mao kini ang gibasihan sa usa ka pundok nga milakip sa Sugbo sa listahan sa mga "livable city" sa nasud.