Modus sa chain letter

Tingali nakadungog na kamo mahitungod niining gitawag nato og "chain letter". Usa kini ka paagi sa pagpakaylap sa usa ka mensahe pinaagi sa pagsulat. Kadaghanan sa mga chain letter bahin sa pagtuo o relihiyon.

Kasagaran sa chain letter naglatid sa usa ka pag-ampo o debusyon ngadto sa usa ka partikular nga Santo. May mga higayon sab nga ang unod sa chain letter naglatid sa usa ka mensahe o pahimangno nga gipatuo nga iya sa usa ka Santo ug kini kinahanglang ipakaylap aron daghan ang masayod sa maong mensahe.

Okey ra man kini kay dili man makahasol. Naa ra pod nato kon motuo ba kita o dili sa bisan unsang gipasalig nga kabulahanan o gipasidaan nga kakuyaw kon dili kita mobuhat sa gisugo sa chain letter.

Apan adunay nagsumbong kanako nga adunay lahi nga chain letter nga nauso karon. Ang maong chain letter may dalang panghulga. Gituyo kini aron gayod motuman ang makadawat sa sulat sa unsay gidetalye sa maong sulat.

Ang estilo mao nga kon pananglit ikaw maoy makadawat niining matang sa chain letter nga minao-mao sa mga badlongon sa katilingban, inigbukas nimo sa sobre posibleng makaingon ka nga wala kiniy kalainan sa ubang chain letter. Apan basaha ang katibuk-an aron imong masuta ang dakong kalainan.

Kining chain letter nga minao-mao sa mga badlongon migamit gihapon sa ngalan sa mga santo. Adunay tugon nga i-reproduce nimo ang maong sulat ngadto sa 15 ka kopya ug imong ipadala ngadto sa napulog lima sab nimo ka higala.

Human mo matuman ang unang tugon, kinahanglang matuman mo usab ang ikaduhang tugon nga mao ang paghatag og donasyon. Apan adunay gisitar nga kantidad kon pila ang donasyon nga ihatag. Dako ang maong kantidad. Ang kuwarta ipadala ngadto sa usa ka partikular nga ngalan nga nahilakip sa tugon sa sulat.

Sa maong sulat, gipatuo nga daghan na ang mituman sa maong bulohaton ug tugon nga nakadawat og panalangin. Ilang gamiton ang ngalan sa mga iladong tawo sa kalibotan sama sa presidente sa dagkong mga nasud nga nahimong bantogan--tungod kuno sa pagtuman sa tugon sa chain letter.

Ila usab nga gamiton ang ngalan sa iladong mga tawo sa kalibotan nga nangamatay tungod sa aksidente. Ang maong disgrasya tungod (kuno) kay wala sila motuo sa tugon sa chain letter nga ilang nadawat.

Mao nga kadtong mga matuotuohon ug daling mahadlok motuman na lang dayon sa unsay gitugon sa chain letter. Mohatag sa gipangayong kantidad. Wala pa hinuo'y gikataho nga may nabiktima sa ingon niini - kana bang nakahatag gyod og kuwarta. Apan may nakadawat na og ingon niini nga matang sa sulat-pangilad. Pagbantay kamo niining maong modus operandi.

* * *

(Sumbong ug reklamo? Text sa 0910-8105522)