Ganyan na ba ngayon ang sistema? Hindi na kinikilala ng bagong administrasyon ang mga kontratang pinasok ng dating pamunuan? Tsk, tsk. Bad yan.
Ayos sana ang boardwalk sa Luneta. Bukod sa pasyalan, may lugar pa ang mga small entrepreneurs na magtayo ng mga tindahan. Karamihan sa mga stalls ay mga fast food stores. Doo’y puwedeng magmeryenda, mag-lunch o dinner (as the case may be) ang mga namamasyal o nag-i-aerobics.
Inireport ng ating tagapag-ulat na si Danilo Garcia kamakailan ang tungkol sa paghingi ng saklolo ni Philippine Tourism Authority (PTA) Gen. Manager Robert Dean Barbers sa Western Police District sa pag-demolish sa puwesto ng mga tinaguriang "professional squatters" sa boardwalk. Naganap ang demolition. Maraming stall owners na kasapi ng Luneta Boardwalk Tenants Association, Inc. (LBTA) ang nawalan ng negosyo. Sa pamamagitan ng legal counsel na si Atty. Angel Gatmaitan, mayroon nang kasong isinampa laban sa PTA ang LBTA sa Regional Trial Court ng Maynila (case no. 05-112595) upang magtamo sila ng hustisya. Balita ko pa’y kinasuhan na rin ng mga kawawang tenant sa Ombudsman si Barbers.
Hawak ng mga pinatalsik na tenants ang mga resibo na katunayang nagbabayad sila ng kaukulang upa sa PTA. Ayokong isipin na ginawa ang demolition para papasukin ang mga pinapaborang negosyante. Napag-alaman natin na mayroong mga pinapasok na dayuhan para mangalakal sa boardwalk. At napakaganda ng kondisyon sa kasunduan porke hindi sila obligadong magbayad sa mga araw na may forced madjure situation tulad ng bagyo o panahong hindi sila makapagtinda. Daing nga ng kaibigan kong si Edna, bakit ganoon? Noong sila ang umuokupa ng stalls, bumagyo man o hindi ay obligado silang magbayad ng upa.
Pinabulaanan din ng mga kasapi sa LBTA ang alegasyon ng PTA na mayroon sa kanila na kusang nag-waive ng karapatang mangupahan. Sapilitan daw o puwersahan silang pinaalis. Harinawang mabigyan ng katarungan sa lalung madaling panahon ang mga apektadong tenants. Naghahanapbuhay sila ng patas kung kaya’t hindi sila dapat pagkaitan ng kanilang pinagkakakitaan.