Kon di pagpanglingla ang iyang gihimo sa mga Sugbuanon nga kunohay iyang gitan-aw ang kaayohan sa iyang mga molopyo hinungdan nga buot niyang mobuwag ang iyang didtrito isip usa ka probinsiya, nganong hilabihan niyang nakakisi kisi sa dihang misuway si Gobernador Gwendolyn Garcia pag-esplikar atol sa hearing?
Way angay nga kahadlokan si Martinez bisan unsa pay isulti sa gobernador kon siya kombinsido sa iyang mga argumento nganong gusto siyang magtukod og kaugalingong probinsiya tungod kay ang Sugbuanon dili bogo nga di kasabot kon kinsay nagpakaaron ingon.
Nganong di man siya gusto nga tubagon ni Garcia ang mga pangutana sa ubang mga kongresista kon unsay kaayohan o kadautan nga mahimo kon buk-on ang Sugbo, nga unta mao man kini'y hinungdan nganong dunay hearing ang komitiba.
Sabton ba sa mga Sugbuanon nga mikakak si Martinez tungod kay mabulgar ang iyang pagpakaaron ingon nga alang sa kaayohan sa mga Sugbuanon ang iyang gihimo, bisan ug ang tinuod iyang personal nga interest ang iyang gipatigbabaw sa maong lakang?
O nahadlok siyang lupigon siya sa lantugi ni Garcia hinungdan nga siya nagbinastos atol sa hearing aron mapugos ang komitiba pag-undang niini? Bastos ug "unbecoming" sa usa ka kongresista ang iyang gihimo nga pagpamalikas atubangan sa iyang mga kaubanang kongresista ug sa ilang bisita atol sa maong hearing nga angayang di palabyon sa liderato sa Kongreso.
Nganong gitugotan sa liderato sa kongreso nga magpadayon ang bastos nga batasan sa ilang mga kauban. Dili batasan sa usa ka honorable nga mga tawo sama sa usa ka kongresista ang pagtabi samtang dunay mihimo og presentasyon atol sa hearing hilabi pa kon ang magsulti bisita sa komitiba. Labaw nang di maayo alang kanila nga balikason ang ilang bisita kon di silang kaayon sa isulti niini.
Murag naanad na ang uban natong mga kongresista nga samtang dunay ilang kauban nga nagdiskurso ang uban kanila magtabi samtang ang uban magpunay ug paso-paso sa hanawan.
Angayan sab nga likayan sa maong mga opisyal ang pagpasuwabi sa ilang mga personal nga kasungian aron masabtan ug maayo sa katawhan ang lintunganay sa maong mga balaudnon. Si kongresista Emilio Macias nga maoy chairman sa komitiba angayan usab nga molikay paghatag og mga pamahayag nga maghatag og impresyon sa katawhan nga iya nang gihukmang daan ang maong mga balaudnon.
Klaro sa pamahayag ni Macias ang iyang pagpabor sa tulo ka mga balaudnon, busa alang nako angayan siyang mo-inhibit gikan sa pagpadayon pagdungog niini. Kon dunay dilikadisa si Macias mas maayong iyang itugyan ngadto ni Camarines Sur congressman Luis Villafuerte ang pagdumala sa hearing aron malikayan ang pagduda nga luto nang daan ang mamahimong aksiyon unya sa komitiba.