Mohatag og P500

Mga suki, gisubli-subli na nako pagbulgar dinhi ang nagkadaiyang estilo sa modus operandi sa grupong Budol-budol Gang. Apan ania pa gyoy lain nilang modus nga hayan wala pa masayri sa kadaghanan.

Ang ilang estilo mao ang pagpaniid sa mga tawo nga mosulod sa bangko. Ilang sutaon kon kinsa sa maong mga tawo ang mo-withdraw og dakong kantidad. Sa higayon nga may mapili na silang biktimahon, mogawas sila pag-una sa bangko. Sa gawas ilang hulaton ang ilang prospective victim.

Sagad kining gihimo sa tulo ka suspek, duha ang babaye ug usa ang lalaki. Iniggawas sa ilang prospect gikan sa bangko, ang duha ka babaye maoy mosunod niini. Unya kon makakita nag tukmang tayming, moduol dayon ang duha ngadto sa ilang prospect dayong tunol og tibuok nga P500.00.

Siyempre, makugang ang ilang prospect. Pero dali ra usab silang makapasabot sa pag-ingon: "Imo na kana. Tudloi lang mi kon asa ang baratong hardware dinhi kay mopalit mig puthaw. Hatagan ka namog komisyon."

Unya moabot ang usa ka lalaki nga nagdala og bag. Ipakita dayon niini ngadto sa prospect ang sulod sa bag nga pulos kuwarta. Patuohon dayon niini ang prospect nga maiya ang maong kuwarta basta makatabang siya kanila aron makapalit og puthaw nga barato.

Tungod sa kadaghan sa kuwarta, kinsa man kaha ang dili matental. Mao nga magkasinabot dayon sila. Ang sunod nga lakang nga himuon sa mga suspek mao ang pagdala sa prospect ngadto sa usa ka kan-anan. Mangaon sila. Samtang nangaon, walay puas sa pagbulatik ang tulo ka suspek ngadto sa ilang biktimahonon.

Pagkataudtaod, usa sa mga suspek ang moingon nga mohulam una siyag kuwarta ngadto sa prospect. Sa dili pa kuno sila moadto sa hardware, may lain pang paliton ang mga suspek ug ibilin lang nila ang prospect sa kan-anan aron maoy mobantay sa bag (nga puno sa kuwarta) nga ila lang ibilin.

Sanglit nasayod na ang mga suspek nga dako ang kuwartang gi-withdraw sa ilang prospect gikan sa bangko, dako ang kantidad nga ilang yamaron nga hulaman. Mopahulam sab ang biktimahonon sa walay pagtanom og daotang hunahuna. Total, ibilin man kaniya ang bag nga puno sa kuwarta.

"Dinhi ka lang, ha," matud sa usa sa mga suspek. "Ayaw paglakaw kay mobalik dayon mi. Bantayi una kanang bag."

Mosanong ang prospect. Pero maputi na lang ang iyang mga mata sa pagpinaabot dili na gayod mobalik ang tulo ka suspek. Ulahi na niyang madiskubrehan nga papel diay ang sulod sa bag nga gipaibabwan lang og tinuod nga kuwarta. Ulahi na sab siyang makaamgo nga nailad siya.

Kini ang ilang modus sa Budol-budol nga naglihok karon didto sa Tagbilaran City.

* * *

(Sumbong ug reklamo? Text sa 0910-8105522)