Mora'g dili kita makatuo nga nahitabo kadto sa usa ka lugar diin nahimutang ang mga gipangkonpiska nga mga hot cars ug uban pang smuggled items sa BOC. Kini tungod sa kahigpit sa siguridad sa maong dapit.
Sa pagkakaron, dili pa matino ang hinungdan sa maong sunog. Apan daghang mga anggolo ang mitumaw sa maong insidente, lakip na ang pangagpas sa uban nga mora og gituyo kadto.
Apan kon unsa ang hinungdan niadto, agta ray nasayod tungod kay hangtod karon, wala pay konkretong imbestigasyon ang maong ahensiya. Ug kon unsa man ang mogulang resulta sa imbestigasyon sa maong sunog, dili g'yud mawakli ang bahong nasimhot sa uban sa sirkumstansiya nga naglikos sa maong insidente.
Ang nakapait nga kalamboan sa maong insidente mao usab ang grabe nga panagbingkil tali ni BOC district collector Lourdes Mangaoang ug Customs Enforcement and Security Service chief Nestorio Gualberto kalabot kon si kinsay dunay katungod nga mopahigayon og imbestigasyon sa maong insidente.
Gusto ni Mangaoang nga ang National Bureau of Investigation ang moimbestigar sa maong sunog. Apan si Gualberto mitukod og iyang task force, kansang lead agency mao ang Criminal Investigation and Detection Group, pagsusi sa maong hitabo.
Apan gikuwestiyon ni Mangaoang ang lakang ni Gualberto nga usa ka ilegal. Matud niya nga ang balaod nagtugot lamang sa BOC commissioner ug mga district collector pagmugna og usa ka task force pag-imbestigar sa mga panghitabo sulod sa maong ahensiya.
Hinuon, ang away tali ni Mangaoang ug Gualberto naghatag og walay maayong bunga sa imbestigasyon sa maong sunog nga miugdaw sa subra sa P100 milyones ka mga recovered item sa BOC ug uban pang kabtangan sulod sa CPA. Nagdagkot hinuon kini og dugang kalayo sa pagduda sa katawhan nga ang maong sunog usa ka kaso sa arson.
Ang gubot kon si kinsay dunay katungod sa maong imbestigasyon dili maoy labing importante sa lakang pagkuhit sa kamatuoran sa hinungdan sa maong dakong sunog. Usa hinuon kini ka dakong babag sa pakisusi sa maong insidente tungod kay miabot na ngadto sa personal ang away tali ni Mangaoang ug Gualberto.
Dili na siguro kinahanglan pa nga pahimangnoan kining duha ka tang-ang opisyal sa BOC nga ang ilang panagbingkil wala g'yuy idulot nga kaayohan sa imbestigasyon sa maong sunog. Hangtod nga walay maayong koordinasyon nga ipakita kining duha ka opisyal, wala g'yuy maayong pakisusi sa maong insidente ang ikasiguro ngadto sa katawhan.