Ang Dios Miingon...

Pamalandong matag Domingo
Agosto 7, 2005: Ikanapulog-Siyam nga Domingo sulod sa tuig (St. John Marie Vianney Sunday)
Mga Pagbasa: 1 Mga Har. 19;9,11-13/Rom. 9;1-5/Mt. 14;22-23

Lunod, unos ug Pagtuo

Niadtong second year theology pa ko, nahinumdom ko sa gipaambit sa akong amigong seminarista nga sakop sa Dyosesis sa Talibon. Pari na ni siya karon. Niadtong higayona, na-assign ko sa VMCI (Visayas Mission Confraternity Inc.), didto sa Bohol. Mao nga natural lang nga Biyernes pa sa gabii, sakay nako sa barkong Andy o kaha Yello Rose. Kay barko man lagi, mao nga dili kalikayan ang paghisgot mahitungod sa lunod-lunod. Matud pa sa akong amigo nga sa dihang nagpadulong sila sa Talibon via Jetafe sakay sa gamay'ng pumpboat, adunay kadaot nga nahitabo kay nabuslot man kini. Dugang pa, overloaded sila atong higayona og dili gyud paigo ang mga lifejackets! Kahadlok ang mihari atong higayona. Pagkangalan nga seminarista siya, mao nga siya maoy nangulo sa pag-ampo sa santos nga Rosaryo. Kusog og kinasingkasing kuno ang sabat sa mga tawo samtang busy kaayo ang uban sa pag-ayo sa daot. Salamat sa Dios kay naayo gyud ang daot sa dihang ilang gisugdan ug ampo ang ikaupat nga misteryo sa himaya. Ang nakapatingala niya kay, sa dihang naayo na ang maong pumpboat og halayo na ang mga sakay sa posibilidad nga malunod, nihinay og nihinay naman hinuon ang pagsabat sa mga tawo. Kaha lagi, kay gikapuyan naman pud siya'g sing-al, mihilom na lang pud siya og nag-ampo sa rosaryo sa kinaugalingon na lang...

Dili kita makaseguro sa matag higayon nga kita anaa sa lawod. Wala kita masayud kon unsa ang anaa sa kahiladman niini. Sa Jewish Cosmology, ang lihok ni Jesus diin nilakaw siya ibabaw sa tubig usa ka matang sa pagdaog batok sa kangitngit. Usa kini ka timailhan nga siya gayud ang mohingpit sa kabuhatan. Natural lamang nga bation pud og kahadlok ang mga apostoles sa ilang pagkakita kaniya. Kahadlok nga mabahin nato sa duha. Ang kahadlok nga Balaanon nga maoy mitukmod aron siya simbahon. Ang kahadlok nga nagbunga og kalisang tungod sa pagduha-duha sama sa nahitabo ni Pedro. Ug sa dihang sila nakabalik na sa sakayan, nilurang ang unos, timailhan nga kining nakigkuyog sa mga apostoles adunay gahum over and above all nature. Dinhing dapita, sila inanay nga nakaila kon kinsa og unsa ang ilang magtutudlo.

Matag tawo naa na anang Pagtuo (Anthropological Faith) kay embodied naman sa atong kinaiya nga kita orientated towards the infinite. Apan usahay lang, dili lang gyud tuyoon nga moabot ang mga higayon nga gamhan kita sa pagduhaduha og pagkawalay pagtuo, labina kon moabot ang higayon nga kita, kuso-kusohon og mga dili tiaw nga kalisud. Maka-pangutana kita, kon nganong usahay dili patas ang kinabuhi. Dunay mga tawong haruhay, wala lisud-lisora sa kinabuhi. Unya ironically, kining uban ra ba mga walay simba-simba ni walay ampo ni pag-ila sa Ginoo. Kita hinuong nagpaduol kaniya, daw sa lutoson naman hinuon. Hinungdan nga usahay, maunlod, ma-depressed, o kaha mawad-an sa kainit nga mag-ampo.

Usa ka dakong hagit nato nga atong usisahon kon unsa gayud ang atong pagtan-aw sa Ginoo og unsa gayud ang atong pagsabot sa pagtuo. Ang Ginoo ba, duolon lang nato aron patubagon sa atong mga problema og kon masulbad na molunga na lang pud ta sa pagsangpit kaniya sama sa mga sakay sa sakayan paingon sa Bohol? O unsa ba gyud ang pagtuo? Kon kini pakiglambigit asa man kini dapita sa atong kinabuhi? Diha ba sa mga butang imposible o kaha diha sa pag-aninaw sa presensiya sa Dios diha mismo sa atong mahilomong pakighinabi kaniya diha sa kalikupan og sa kinaiyahan. Hinuon, wala pa kaayo tingali ta makatubo sa atong pagtuo kay daghan pa man kanato ang mituo nga naa og naa ra gyud ang Diosnong gahom sa nabantog nga....Dancing Sun!