Napulo ka mga individual ug duha ka mga institusyon ang modawat sa maong pasidungog tungod sa nagkalainlaing kalampusan nga ilang naangkon nga nahimong garbo ug dungog sa Sugbo.
Way lalis ang maong mga tawo ug institusyon nga hatagan sa maong pasidungog karong gabii angayan ug takos sa pagdawat niini. Apan usa ka tawo nga maisip nga maoy tinuod nga garbo sa Sugbo niining bag-ong panahon tungod sa daghang mga butang nga iyang nahimo bisan sa hamubo palang nga panahon sa iyang pagserbisyo ang wa maapil sa listahan.
Tungod ba kaha sa delicadeza kay dili maayo nga ang tawo nga maoy utok sa paghatag sa maong pasidungog moapil sab ug dawat niini? Apan nganong dili? Usa ka dakong garbo sa Sugbo ug sa mga Sugbuanon ang pag-ila kang gobernador Gwen Garcia sa Asia Inc Forum isip usa sa 100 ka mga lalaki ug babaye sa Asya nga labing bright ug labing masaarong opisyal sa gobyerno dinhi sa Asya.
Ang gobernador uban sa laing upat ka mga iladong tawo sa Pilipinas sama nila ni Senador Mar Roxas, Francisco Pangilinan, Kongresista Edmundo Reyes sa Mindoro ug ang negosyante nga si Jaime Zobel de Ayala maoy giila sa Asia Inc Forum nga lakip sa 100 sa labing bright dinhi sa tibuok Asya.
Nunot niini sila gidapit alang sa ASEAN 100 leadership forum karong umaabot Septembre 28-29 didto sa Singapore. Uban nila sa maong forum ang Prime minister sa Singapore nga si Lee Hsein Loong, Malaysian Deputy Prime minister Dato' Sri Najib Razak, Indonesian defense minister Juwono Sudarsono ug ang chairman sa Li &Fung, ang labing malamboon nga business enterprises sa sidlakang Asya nga si Dr. Victor Fung aron tukion ang mga hagit nga giatubang karon sa Association of Southeast Asian Nations taliwala sa leadership transition didto sa Indonesia, Malaysia ug Singapore.
Lakip sa ilang tukion mao ang gipaabot nga "competitive challenges" nga mugna sa economic re-emergence sa China ug India.
Ang gibasihan sa Asia Inc Forum pagpili sa 100 ka mga delegado mao ang ilang katakos pagpamuno sa ilang tagsatagsa ka mga nasud sa mosunod nga dekada ug ang ilang posibling mahimo alang sa kaugmaon sa ASEAN.
Dili ba angay ug matarong lang nga atong iapil si gobernador Garcia sa maong pasidungog karong gabii kay dili lang garbo sa Sugbo ang iyang gihatag kon dili garbo sa tibuok nasud nga Pilipinhon.