Sa akong bahin, gusto nga mahibaw-an dayon sila. Matud ni Kongresista Roque Ablan nga ang mga local contacts ni Calvin de Jesus Tan naglakip sa mga dagkong opisyal sa kapolisan ug dunay mga elected officials.
Nakuha ang maong lista gikan sa lap top computer ug cellphone ni Tan nga nasakmit sa mga polis dihang si Calvin Tan nadakpan didto sa Macau City upat ka adlaw human maronda ang shabu laboratory diha sa Mandaue kaniadtong Septembre sa miaging tuig.
Alegre kaayo kon mabutyag na ang ngalan sa maong mga local contacts ni Calvin Tan.
Sa laing bahin, angay g'yod tinuod nga mabalaka si Mandaue City Mayor Thadeo Ouano kon ang bana ni Kongresista Nerissa Soon-Ruiz magsigi og paduol ni Calvin Tan nga maoy gitumbok nga financier sa mega-shabu laboratory nga nadiskobrehan diha sa barangay Umapad.
Abi ninyo og ngano? Nasayod na kita nga bisan tuod og medyo nagkauli na og gamay ang maayong kabubut-on nila ni mayor Ouano ug Kongresista Ruiz, apan molutaw g'yod gihapon nga kontra sila sa politika.
Wala usab malilong nga si Mayor Ouano gipasanginlan nga nasayod sa pag-operate og shabu laboratory diha sa Mandaue. Kini man gani maoy rason nga pwerteng pagkisi-kisi sa mayor nga sayop ang maong pagduda.
Isip pagmatuod nga wala siya'y bisan gamay'ng kalabutan ug kasayuran sa pag-operate sa maong shabu laboratory, iyang gipresentar ang mga ebidensya nga usa ka adlaw sa wala pa masakpi ang shabu laboratory mihatag siya og dakung kantidad nga salapi ngadto sa kapolisan diha sa Mandaue.
Ang maong kwarta gitagana aron gastohon sa mga police sa ilang anti-drugs operations. Kuyaw tuod kaayo kon si Lito Ruiz nga bana sa kongresista mohunghong ngadto ni Calvin Tan aron nga ipabutyag nga apil si mayor Ouano sa mga Sugboanon nga nakigkonsabo sa pag-operate sa shabu laboratory.
Bisan pa man og moingon si Ruiz nga gitahasan siya sa House committee on dangerous drugs nga magsilbi nga " liaison " aron pagsuta sa kasigoroan nga dili gayod makaikyas si Calvin Tan, apan salikwaot kaayo kon magpaduol siya sa maong suspetsado.
Dili usab kaayo ko motoo sa rason ni Kongresista Antonio Cuenco nga boluntaryo kuno nga misugyot si Kongresista Ruiz sa serbisyo sa iyang bana kay sigurado man g'yod nga magdumot kang Cuenco ang mga magpapatigayon nga posibleng mahibaw-an sa ilang kalambigitan sa pagmugna og shabu laboratory.
Unsa god tawo'y mahimo ni Lito Ruiz kon tinuod man nga dunay nagplano og dautan kang Cuenco. Wala na kinahanglana si Lito Ruiz kay daghang security nga kanunay'ng nag-uban-uban ni Cuenco.
Kon magkinahanglan pa man og dugang security si Cuenco, mora'g dili tingali haum si Lito Ruiz sa maong katungdanan.