ANG DIOS MIINGON...Pamalandong matag Domingo

HULYO 31, 2005: Ikanapulog- Walo nga Domingo sulod sa tuig Fil-Mission Sunday
Mga Pagbasa: Is. 55;-3-Rom-8:35,37-39/Mt. 14; 13-21
Bolgor, Soya, ug uban pa

Daghan ang nabitin sa state-of-the-nation address ni Presidente Gloria Macapagal-Arroyo sa niaging semana. Matud sa uban nga wala sila ganahi naminaw sa Presidente tungod kay iyang gilikayan ang labing init nga isyu nga kasamtangang mihapak sa iyang pangagamhanan.

Ang maong isyu mao ang nabaniog na kaayong alegasyon sa iyang pagpanikas sa nakalabay'ng piniliay. Gani ang maong akusasyon misangpot na ngadto sa pagpasaka og impeachment complaint batok kaniya sa Ubos Balay Balauranan.

Gusto siguro sa uban nga mismo ang Presidente mopadayag sa iyang reaksiyon kalabot sa maong alegasyon. Apan nasayop sila tungod kay wala panumbalinga ni Arroyo ang maong isyu atol sa iyang SONA.

Mora'g nakaiskor usab ang Presidente sa iyang wala paghisgot sa alegasyon batok kaniya atol sa iyang SONA. Kini tungod kay daghan sa mga political expert ang mipadayag nga mosamot ka bati ang imahe sa Presidente kon iya pang gigamit ang SONA pagpanagang sa isyu kalabot sa giingong pagpanikas niya sa eleksiyon sa niaging tuig.

Bitaw, ang SONA maoy panahon diin ang pangulo motaho sa mga programa sa kalamboan sa iyang panggobiyerno. Mao usab kanang higayona diin ang Presidente mopadayag sa iyang umaabot nga mga programa ug proyekto nga angay niyang ihan-ay sulod sa iyang pagpangatungdanan.

Ug tungod niini, angay lamang nga dili sagolan og pamolitika ang SONA. Usa kini ka higayon diin ang pangulo makig-estorya sa tibuok katawhan sa mga importante'ng kalihokan sa iyang kagamhanan.

Apan ang wala nako mauyoni sa SONA sa Presidente mao kadtong iyang pagkumbinsi sa Kongreso pag-amendar sa Batakang Balaud aron pag-usab sa sistema sa atong panggobiyerno. Ug klaro usab nga dako kaayong pamolitika ang gibuhat ni Arroyo niadtong tungora.

Kon usbon ang sistema sa atong pangagamhanan, unsay garantiya nga ato nang makab-ot ang ekonomikanhong kalamboan? Unsa ba g'yuy maani nga kaayohan sa Pilipinas kon mohalog na kini sa parliamentary nga pamaagi sa panggobiyerno?

Mora'g nagdamgo sa udtong tutok kining atong mga opisyal kon ila g'yud nga ipamugos ang pag-amendar sa atong Konstitusyon. Wala siguro sila mahibalo nga gikan na ang Pilipinas sa parliamentary form of government apan wala gihapon kini miasenso.

Sa ako nang gikaingon, wala sa sistema sa atong pangagamhanan ang sakit ngano nga pabilin kitang mga Pilipino nga naglunang sa tumang kalisod. Ang problema anaa ra sa mga namuno sa atong nasud kinsa napuno sa mga pamolitika.

Kon gusto g'yud kita og kalamboan, kakugi lamang sa mga nagkupot sa renda sa pangagamhanan ang atong gikinahanglan. Hinuon dili perpekto ang atong Konstitusyon. Apan sa akong nakita, ang grabe'ng pamolitika sa atong mga opisyal maoy naghatag og babag sa ekonomikanhong kalamboan sa nasud.