Arson?

Angayang bantayan ni customs district collector Lourdes Mangaoang ang posibilidad nga gamitong rason sa mga kukhan nga kawani sa aduana ang dakong sunog sa miaging kadlawon pagtabon sa pagpangahanaw sa mga nasakmit nga kontrabando.

Mikatap ang pagduda nga gituyo ang sunog sa warehouse nga gipanag-iya sa Cebu Ports Authority diin didto ibutang sa customs ang minilyon niini nga mga kontrabando nga nasakmit aron pagtabon sa daghan nga mga butang nga mga nahanaw.

Dali hinuon nga nakapanalipod si Mangaoang pinaagi sa pag-ingon nga atol sa iyang termino way mga butang nga nahanaw. Pagpakita nga sinsiro siya niini, iyang giawhag ang National Bureau of Investigation nga mohimo og imbistigasyon sa posibilidad nga arson ang maong sunog.

Dalaygon ang maong lakang, apan angayan usab nga bantayan ni Mangaoang ang posibilidad nga ang ubang mga butang nga wa malakip sa sunog kawaton sa mga kurakot nga kawani sa customs ug ipagawas nga naapil sa sunog.

Way dag-anan si Mangaoang kon buhaton kini sa iyang mga sakop hilabi pa og naapil sa sunog ang imbentaryo niini didto sa buhatan sa wharfinger.

Kaanugon sa P70 ngadto sa P100 ka milyon nga kantidad sa mga nasakmit nga kargamento nga gilamoy sa kayo inay nga magamit pagtabang sa nag-ilaid nga kahimtang sa panalapi sa nasud. Matud ni Mangaoang nga lakip sa mga nasunog nga kargamento dugay na nga napundo diha sa warehouse ang uban niini miabot na gani og lima ngadto sa 10 ka tuig.

Nganong ingon man niini kadugay ang pagkapundo sa maong mga kargamento? Kon nadali pa unta kini sa pagsubasta nakasapi unta ang gobyerno sa maong mga kargamento. Ang grabing burukrasya sa gobyerno usa sa mga mabasol sa pagka-usik sa maong dugang unta nga kwarta sa atong panudlanan.

Ang makaluluoy mao kadtong tag-iya sa mga kargamento nga dunay pending nga kaso tungod kay wa na gyud hinuon silay makuha tungod sa kalangan sab sa pagresolbar sa kaso.

Usa sa biktima sa grabing burukrasya sa atong gobyerno mao ang Cebu Doctors Hospital tungod kay mokabat sa kapin sa P10 milyones ang kantidad sa ilang mga ekipos gikan sa gawas ang naapil og kaugdaw.

Matud ni Deo Alberca ang broker nga naghupot sa maong kargamento nga nalangan ang pagrelease sa maong kargamento tungod kay hilabihan kalangan ang paghikay sa mga papeles aron sila makakuha og exemption sa pagbayad og buhis.

Matud ni Alberca nga ubos sa balaud mamahimong malibre pagbayad sa buhis ang mga kagamitan alang sa edukasyon ug sa serbisyo sa panglawas.

* * *

e-mail:[email protected] or text sa 09208370527.