EDITORYAL - Customs bodega naugdaw

Naugdaw ang bodega sa Bureau of Customs dinhi sa Sugbo adtong milabay'ng gabii. Ang danyos gibanabana nga mikabat sa P60 milyones.

Naapil sa pagkasunog mao ang duha ka laing establisamento kansang danyos wala pa mahibaw-i atol sa pagsuwat niini.

Unsay naa sa sud sa Customs bodega? Sumala sa atong reporter tinumpi-tumpi nga mga butang nga gikompiskar sa Adwana tungod kay kini namatud-ang pinayuhot kun smuggled ug uban pang mga butang nga butang nga pinasagdan na lang sa mga tag-iya gumikan tingali sa kasamok sa proseso sa pagkuha niini. Ang uban pa gyud mga ebidensiya sa mga kasong smuggling nga hangtud karon wala pa ma resulbar.

Daghan ang mga pangagpas kabahin sa nahitabong sunog. Naay miduda nga tinuyoan ang maong sunog aron ang mga ebidensiya mahanaw. Naa say mipasangil sa faulty electrical wiring nga mao kanunay natong madungog kun dunay dagkong sunog.

Kun unsa may hinungdan sa maong sunog, kinahanglan gayud nga susihon aron molutaw gayud ang tinuod.