Makadaghan na ako makadawat og sumbong nga nabiktima sila niining badlongon nga mga sakop sa Laglag Barya Gang. Apan ang maong mga hitabo kasagaran dinhi lang nahitabo sa dakbayan sa Sugbo. Apan karong bag-o, gikompirmar sa usa ka texter nga naglihok na usab ang Laglag Barya sa dakbayan sa Mandaue ug Lapu-Lapu.
Sumala sa asoy sa texter, dili siya mismo ang nabiktima sa Laglag Barya kondili ang iyang bayaw nga motubag sa ngalan nga Zenia F. Garcia. Naigo o nabiktima kini sa Laglag Barya samtang nagsakay og PUJ paingon sa gitrabahoan niini.
Segun sa giagoy sa atong texter, mao gayoy kasagarang biktimahon niining mga tawhana ang pasahero sa mga jeep nga magbiyahean sa Mandaue City ngadto sa Lapu-Lapu City, ug vice versa.
Niadtong Hulyo 14, alas sayis sa gabii, nabiktima si Zeny Garcia sa Laglag Barya samtang paingon siya sa trabaho. Wala hinuon isugid sa atong texter kon unsay trabaho sa biktima nga magabii man ang itambong niini. Basta iya lang giasoy nga nawagtang gyod ang Nokia cellphone 3315 sa iyang bayaw tungod kay nalingla siya sa kaabtik sa mga kamot sa Laglag Barya.
Ang estilo sa ilang modus operandi sama ra gihapon sa ubang mga sakop sa Laglag Barya Gang. Kon may makursonadahan silang biktimahon, tuyoon gyod nila ang paghulog og sensilyo sa tungod sa pasahero nga ilang prospect.
Mao kini ang nahitabo sa bayaw sa atong texter. Dihang may nahulog nga sensilyo sa iyang tungod, iya kining gipunit ug gitunol ngadto sa usa sa mga suspek. Nagpasalamat pa kuno ang suspek kaniya. Apan wala lang siya makaalinggat nga nawagtang na ang iyang cellphone.
"Mao na diay to. Wagtang ang iyang cellphone. Diha siya sakay sa PUJ sa may eskina sa Burgos ug AC Cortez Avenue," nagkanayon ang atong texter nga tag-iya sa cellphone number 0917-2415125
Sumala gihapon sa maong texter, upat ka suspek ang naghimo niini. Ang usa tomboy ug ang tulo pulos lalaki. Pagbantay gayod kamo niini. Kon mosakay kamog PUJ sa dapit nga ato nang nahisgotan, bantayi ninyo kon wala bay tulo ka lalaki ug usa ka tomboy nga midungan pagsakay kaninyo. Basin mao na kana ang mga sakop sa Laglag Barya nga nag-operate sa maong dapit.
Sumala sa atong texter, sagad anha gayod mamiktima ang mga suspek sa PUJ nga ang rota o biyahe mao ang Mandaue - LLC. Anha sila manukad pagsakay sa AC Cortez eskina sa Burgos. Pagbantay...! Pagbantay...! Pagbantay...!