HULYO 24, 2005: Ikanapulog- Pito nga Domingo sulod sa tuig
Mga Pagbasa: 1 Mga Hari 3;5,7-12/Rama 8;28-30/Mateo 13; 44-52
Tubig!
Dili pa lang gyud dugay, nahiagoman dinhi sa Seminario Mayor de San Carlos ang dakong suliran mahitungod sa tubig sanglit, naguba man ang among pump. Mao daw sa lisud gyud kaayo ang pagpuyo, labina kon magnihit gyud ang usa ka pinakamahinungdanong bahin sa among inadlaw'ng pagkinabuhi nga mao ang tubig. Ang maong kasinatian, naghatag kanamo'g leksyon. "Conserve Water Next time!" Ug kay lagi, panginahanglan man gyud kaayo, mao nga kinahanglang mogasto gyud og dako-dakong salapi, panahon, ug pagpailob aron makuha lamang ang maong tuyo. Butang nga dili masinati og pangitaon kon naa pa sa akto sa pagka-abunda.
Lain na pud nga matang sa sambingay nga nagpunting sa Gingharian sa Dios ang angayan natong hisgutan karong Domingoha. Ang sambingay nga naghisgut mahitungod sa mutya, sa baling og sa mga tinun-an alang sa Gingharian sa Dios. Kon atong tagsa-tagsaon, atong mapupo kining mosunod nga mga mensahe:
1. Una, ang Gingharian sa Dios usa ka bahandi nga dili gayud ikatandi ni bisan unsang matanga sa bahandi ning kalibutana. Ang nanghingapin nga mga hiyas sa maong Gingharian, maoy makapatukmod kanato sa usa ka mahinungdanong pagpili. Unsa may atong palabihon, Ang Dios ba diha sa pagpahari kaniya sa paagi nga mas masabtan og matugkad sa atong tawhanong panabut o ang pagdumili kaniya tungod sa kapasikaran nga mas nahalansang kita sa bisan unsang butang nga dili diay mahinungdanon?
2. Ikaduha, wala gyud kitay mahimo sa buhing matuod nga ning atong kalibutan, pila lamang ang mga maayo og naglunop ang mga dautan. What we need is patience not violence. Kay ang katilingban dili gyud mausab sa bangis og niluog nga paagi. Moabot ra unya ang hustong panahon nga kini himuon sa mas dunay katungod pa kay kanato. Hinuon, wala kini mahisakop sa atong Takna og mga gutlo, kondili mahasibo kini sa kabubut-on og takna sa Dios.
3. Ikatulo, ang Balaod sa Daang Tugon mahinungdanon man tuod apan ang atong Ginoong Jesus mi-sumada kanila sa Balaod sa Gugma, Pagpaubos, og Pagpasaylo. Ang pagkat-on sa maong Bag-ong Sugo maoy makapahimo sa usa ka tawo nga Tinun-an alang sa Gingharian sa Dios.
Usahay baya dili gyud hisabtan ang kinaiya natong mga tawo. Banga kaayo kita sa mga daghang mga butang og mga concerns sa kinabuhi. Usahay maglisud na gani kita diha sa pagpakanaog sa atong mga hukom. Maglisud kita og pag-differentiate kon essential ba o accidental lamang ang butang. Usahay maglisud na kita og determine kon kini bahandi ba gyud o adorno lamang. Daw nabombahan na kita sa mga daghang mga kagahub diha sa mga advertisements og mga ads sa mga mantalaan, radyo og telebisyon. Nalato na kita sa mga isyung Gloriagate, Hello Garci, og Visayas Republic. Kon atong aninawon ang maong mga hitabo, asa man nahimutang ang Gingharian sa Dios? Ug kon wala, unsa may atong himuon aron mas ma-contextualize ang maong mga mithi sa Gingharian sa Dios dinhi sa Yuta? Ug kon si Jean Paul Sarte nagkanayon: "I am a human being, and I must invent my own path, then para asa og ngano? Tingali, ning higayona angay na kitang mosalindot sa atong mga naandang tipo sa pagkinabuhi bisan pa man kon kini sakit. Kay diha lamang sa pag-prioritize sa unod og mensahe sa Gingharian sa Dios diha sa lawa sa pakiglambigit kita makaangkon og kahingpitan og katagbawan sa tinuoray nga bahandi.