Masyaw mayor sumpoa

Kadtong mga tawo nga mipabor nga pasagdan lang ang illegal nga operasyon sa masyaw kay kuno nakatabang sa mga kabus, wala motubag sa tinuoray'ng isyu.

Nakadawat na usab ko og text message kagahapon sa buntag, tingali human mabasa niya ang akong lindog. Maayo kuno ang masyaw kay sa 25 sentimos nga pusta makadaug na og P100.

Unya, kon may makahatag kuno kanila og "tip" sa numero nga maoy modaug, makapusta kuno sila og daku-daku og makakwarta.

Kadtong mi-text nako kagahapon, miangkon nga nakadaug kuno siya og P20,000 gikan sa numero nga gihatag kaniya.

Tinuod, duna g'yoy makadaug panagsa anang sugala apan gagmay ra kay ang tigpasiugda ra man ana maoy magbuot unsay kombinasyon sa numero nga ipagawas.

Kining puntoha maoy tubaga ninyo. Diin man gikan ang kombinasyon sa numero nga padag-on sa mga tigpasiugda niining masyaw?

Duna ba go'y tinuoray'ng duwa sa jai-alai nga gibasihan nila sa mananaug? Dakung pangilad ang gihimo nianang mga tawhana nga gisakyan ra usab sa mga tagdumala og tabloid newspapers.

Ang numero nga gihimo-himo ra usahay ipublikar pa diha sa mga nasudnong tabloid. Unsa, may duwa ba god sa jai-alai fronton sa Manila nga gikuhaan nila og numero sa midaug?

Akong balik-balikon sa pagpahibalo kaninyo nga ang numero nga migawas isip mananaug matag adlaw, buhat-buhat ra sa mga tigpasiugda niining masyaw.

Daghan ko og nahinabi nga mga masyaw financier ug coordinator ug giangkon nila ang binuang aning duwaa. Usa sa mga tawo nga nagpasiugda aning masyaw dinhi sa dakbayan nagtrabaho pa gani sa City Hall.

Mao kini ang tinuod. Ang tanang mga tawo nga nagpadagan og masyaw dinhi sa Sugbo, mapugos sa pagyukbo aning usa ka Mr. WS nga giila nila nga hari sa masyaw.

Kining tawhana maoy nagkontrolar sa mga kombinasyon sa numero nga padag-on matag adlaw. Ang mga bata-bata aning tawhana maoy manawag sa mga tig-imprinta sa tipsheets inigka-lawom na sa gabii og mopahibalo unsay ipatik nga winner kunohay.

Sa laktud, nagkomboya sa binuang ang mga tig-imprinta sa masyaw tipsheets ug ang mga nagpasiugda aning masyaw. Ang usa ka tig-imprinta aning tipsheets dinhi sa dakbayan nakaila kaayo ko uy.

Mahibulong lang ko ni mayor Tomas Osmeña ug ni Konsehal Agustus Pe Jr. kon nganong wala nila pahimoi og paspas nga kampanya kining operasyon sa masyaw dinhi sa dakbayan.

Usahay motoo na lang ko sa tabi-tabi nga maglisud si mayor Tommy sa pagpa-operate sa masyaw kay duna may iyang suod nga amigo. Ayaw ko'g ingna konsehal Pe nga wala ka kaila sa mga financier sa masyaw dinhi sa dakbayan, apil na ang taga Pasil?

Apan bisan pa unta og walay order ang mayor, ang kapolisan unta angay'ng mohimo og hugtanay'ng kampanya. Unsa may gihimo sa Cebu City police intelligence division?

Kining grupo nga gipangulohan ni Koronel Pablo Labra angay'ng mohimo og hugot nga kampanya sa masyaw.

Kamong mga pabor sa operasyon sa masyaw, ayaw na lang ko og hatagi sa inyong baliko nga argumento aron dili nako ibulgar ang binuang sa inyong mga agawon.