Mas sungayan

Kinsa man karoy namakak? Ang nang-resign nga mga sakop sa gabinete nga nipahibawo sa niaging semana nga dunay ubang mga sakop sa gabinete nga mosunod nila? O ang mga nagpabilin sa gabinete nga niinsistir nga usa sa nang-resign mobalik sa pagsuporta ni Presidente Gloria Macapagal-Arroyo?

Sa akong pagsuwat ini, wa pay bisan sa nang-resign nga nibalik sa gabinete, samtang dugang tulo ka sakop sa gabinete ang nibiya sa ilang mga puwesto:

• Victoria Garchitorena, senior adviser on good governance and poverty alleviation;

• Cora Guidote, consultant for investor relations; ug

• Silvestre Afable, communications director.

* * *

Lain ning ebidensiya nga ang nahibiling mga sakop sa gabinete gigamit nang Presidente Arroyo sa pagsangyaw og bakak nga kasayuran ngadto sa katawhan. Nakadugang ni sa kaligdong sa pasangil sa nang-resign nga mga sakop sa gabinete nga ang tanang panahon karon sa Malakanyang gisentro na sa paghaw-as sa presidente gikan sa politikanhong krisis nga iyang nalubngan, hinikalimtan ang mas importante ug mas dinaliang panginahanglan sa nasud ug sa katawhan.

Mangiyugpos ba lang ta atubangan sa abundang ebidensiya nga gigamit nang Presidente Arroyo di lang ang iyang gabinete kon dili hastang lokal nga mga opisyal, kinatibuk-ang makinarya sa gobyerno ug bisan ang pribadong media organizations aron paglubag sa sentimento sa kinabag-an sa katawhan sa tibuok nasud, di lang sa Metro Manila, nga wa nay pagsalig sa kaligdong ug katakos sa iyang liderato?

* * *

Para sa mga kumbinsidong si Presidente Arroyo ang "lesser evil," niay tubag si Vicente Romano III sa elagda.com: "The worst kind of evil is one that surreptitiously makes people condone it while making them believe they do so for a higher good. That is the kind of evil that GMA is. No. She is definitely not the lesser evil."

Nipasidaan si Romano nga kon pasagdan ang maniobra ni Presidente Arroyo moabot ang adlaw nga ideklarar niyang martial law ug awhagon ang katawhan pagpakpak sa iyang kaisog pagsukol sa iyang mga kaatbang. Ang martial law, matod ni Romano, segurong ibaligya na sab sa administrasyon nga "lesser evil."

* * *

Nisiwil ang sidsid sa sayal sa Malakanyang. Human gipagawas ni Ilocos Sur Governor Luis "Chavit' Singson ang "X-Tape" sa giingong plano ni kanhi presidente Joseph Estrada pag-ilog sa liderato gikan ni Presidente Arroyo, nanudya dayon si Presidential Management Staff Chief Rigoberto Tiglao nga tungod sa pagpagawas sa oposisyon sa "Garci tapes," di kapugngan ang pagtumaw sa ubang audio recording nga ilegal sang nakuha.

Ang "X-Tape" nga klarong peke nakapasamot pagpalig-on sa kaso batok sa administrasyon. Klarong ISAFP maoy responsable sa duha ka recordings. Nganong gitugotan mang Presidente Arroyo ang wiretapping nga klarong way pagtugot sa korte? Gawas nilang Erap ug kanhi Comelec Commissioner Garcillano, kinsa pa may ubang ilegal niyang gipapanid-an?

* * *

E-mail: [email protected]