Maayo pa'y maglain

Gumikan lagi sa mga kaguliyang sa kaulohan karon, daghan ang mga lider sa nagkalainlaing lugar ang gusto na mobulag sa sentro sa panggobiyerno nga mao ang Manila.

Gusto na sila nga motukod og kaugalingong panggobiyerno tungod kay wala na sila makauyon sa lihok sa ubang mga politiko sa kaulohan kinsa maoy hinungdan sa krisis nga mitay-og pag-ayo sa atong nasud.

Rason sa mga lider sa nagkalainlaing mga lugar nga mora na hinuon og ang mga lider sa kaulohan nga naghatag og kaguliyang karon ang nagdektar sa atong nasud. Matud nila nga mora'g nawad-an na sila'g katungod sa pagpanghilabot sa kalihokan karon.

Sa nakalabay'ng mga semana, si Davao City Mayor Rodrigo Duterte mideklarar nga kon padayon g'yud ang kaguliyang sa kaulohan ug nga moabot kini sa punto nga mapalagpot g'yud si Presidente Gloria Macapagal-Arroyo sa katungdanan, determinado g'yud siya ug ang uban pang mga lideres sa Mindanao pagputol unya sa Mindanao isip usa ka importante nga bahin sa Pilipinas.

Ang buot nila nga ipasabot nga andam sila nga motukod sa ilang giingon nga Mindanao Republic kon wala nay kapaingnan ang mga kaguliyang sa kaulohan karon.

Mao usab ang tumong sa mga lideres sa Kabisayaan kinsa gipul-an na sa dakong krisis politikal didto sa kaulohan. Sa niaging mga adlaw, ang mga gobernador ug uban pang mga lider sa Kabisayaan nakahukom nga motukod usab sa Visayas Republic kon mosangpot sa pagkalagpot ni Arroyo ang krisis karon sa Manila.

Bisan ako mosimpatiya niining mga lideres kinsa wala na makauyon sa mga panghitabo karon. Kini tungod kay kadto lamang tua sa kaulohan ang nagkaguliyang karon ug wala gani kita dinhi moapil sa mga panawagan pagpalagpot kang Arroyo tungod kay nakahibalo kita nga walay nahitabong pagpanglimbong sa niaging piniliay dinhi, sukwahi sa gipasiatab sa taga-oposisyon.

Dakong insulto alang sa mga Sugboanon ang gipasangil sa oposisyon nga grabe'ng pagpanikas sa administrasyon sa nakalabay'ng piniliay tungod kay nasayod kita nga limpiyo ang eleksiyon dinhi.

Sa akong nakita, wala g'yuy kapaingnan ang mga panghitabo karon sa kaulohan. Naghatag lamang hinuon kini og bati nga imahe sa atong nasud taliwala sa international community.

Apan nganong diktaran man kita sa mga political leader sa kaulohan kinsa walay laing nahimo kondili ang pagsamoksamok sa hapsay tang panggobiyerno? Kon aduna silay nakitang lama sa nakalabay'ng eleksiyon, nganong dili man nila ipaagi sa insakto nga proseso ilalum sa atong Konstitusyon?

Kon wala na g'yuy kapaingnan kining krisis sa politika karon, mas maayo pang ato nalang hiwahiwaon kining atong nasud aron di na kita magahungan sa pipila ka mga mahariharion sa kaulohan.