Drastic change

ANG DIOS MIINGON... Pamalandong matag Domingo
Ikanapulog- :Unom nga Domingo sulod sa tuig
Mga Pagbasa: Kaalam 12; 13, 16-19/Roma 8; 26-27/Mateo 13; 24-30

Nagubot na sab ang atong nasud tungod sa mga lihok protesta sa mga nagkadaiyang sector alang sa hinanaling pagkanaog ni Presidente Gloria Macapagal-Arroyo sa iyang pwesto isip atong pangulo. Daghan na kaayo ang mga nahutdan na sa ilang pasensiya. Daghan na kaayo ang gusto og reporma, kabag-ohan, kamatuoran, integrity, ug uban pang blah blah blah. Daw nahisama na karon si GMA og sagbot alang sa kadaghanan og ang uban kanato daw ni-claim na pud sa ilang pagka-trigo. Daw naka-endanger na sa GMA sa kahimtang sa nasud. Tinuod ba? (kamoy hukom).

Ginaingon pa, walay katagbawan ang tawo. Padayon siyang mangita og kahulogan sa iyang kinabuhi ingon nga rational, spiritual, relational, og political being. Padayon niyang gi-explore kon hain siya haom. Usahay malingla siya sa mga butang og mga nilalang nga naglibot kaniya sa pagtuo nga sila mao ang tubag sa iyang pagpunay og pagpangita sa kahulogan sa kinabuhi. Ug kon ugaling, ang tawo makasabot nga dili diay sa maayo ang iyang sangpotan, siya gusto nga mausab og makalingkawas diha-diha. Gani, dili man gusto nga moagi pa og hataas nga proseso. Gusto og diha-diha.

Dili nato mabasol ang mga sulogoon nga misugyot sa ilang amo nga ilang ibton ang mga sagbot nga ilang nakit-an nga mitubo uban sa mga trigo. Tinarong baya tong ila, apan diha sa kait-on og kaalam ang tag-iya sa uma midili sa kahadlok nga maapil unya ang mga trigo. Hinunoa iyang gitataw nga paabuton lang ang hustong panahon sa ting-ani aron ibton ang mga sagbot aron daoban og ang trigo aron tipigan sa iyang kamalig. Ang sagbot nga gi-refer sa atong ebanghelyo karong Domingoha mao ang gitawag sa Palestina og Darnel, susama gyud kini og trigo. Mailhan lamang kini kon kini motubo na. Dugang pa, kining maong sagbot o weed makahilo og lisod kaayo ibton kay nagtapot man pud ang iyang mga gamot sa mga gamot sa trigo. Ug ang kaaway nga misabod sa maong mga liso sa mga sagbot, mao ang yawa. Buot niyang sakmiton ang dili iya. Buot niyang babagan ang Paghari sa Dios.

Usa ka buhing matuod nga dili gyud hingpit ang atong kalibutan og ang atong nasud nga gipuy-an. Ang Gingharian sa Dios dinhi sa yuta gilangkoban sa mga santos og mga masaylapon. Ug ang pag-usab sa mga hiwing sistema dili nato mahimo dihadiha. Hinunoa, mogahin gyud kita og igong panahon sa pagpamalandong og pag-analyze sa mga sitwasyon. Kay sumaa gud, kining atong pang-gobiyerno karon mao ra man nang matang sa pang-gobiyerno ang nahitabo kaniadto. Naputos sa mga intriga og mga anomaliya. Daghan sa mga milansar og sa mga opisyales ang mga nakapanikas panahon sa piniliay. Daghan kanato ang nakabaton sa usa ka kinaiyang malimbongon. Hinuon ning tungora, dili lang gyud ikalimod nga sakpan lang si Ate Glor. Ang uban waa pa moabot sa ilang hustong panahon og takna. Kay tinuod gyud ang panultihon, walay aso nga makumkom.

Samaran na kita. Dili unta nato himuong madugangan pa ang kabahong sa atong yutawhan pinaagi sa pagtinilaay sa mga nagkadugta tang moralidad, politika, og ekonomiya. Sa mosugot ta og sa dili, matag usa nato dunay rabis og kon ang rabis mokuyanap nan, maghatud kini og pagkabuang ngadto na sa kamatayon. Ning krisis nga atong giatubang karon, ato untang pangayoon ang lamdag sa Dios aron kita makalingkawas niini diha sa paagi nga maampoon og dili ang hinanaling transformation. Atong kinahanglan ang igong panahon nga mo-come up kita og usa ka maalamon og nilamdagan nga desisyon alang sa pangulo og alang sa atong nasud. God Heal Our Land!!!