Kagahapon gihulma na sa 13 ka mga gobernador sa Visayas ang usa ka komitiba nga motuon sa "frame work" ug Constitution sa gisugyot nga Visayas Republic kon mataktak gyud si Arroyo sa pwesto. Nauyonan sa mga gobernador nga gipangulohan nilang Bohol Governor Erico Aumentado, Gwen Garcia sa Sugbo ug George Arnaiz sa Negros Oriental ang pag-umol sa komitiba agig pagpangandam sa posibling pagkataktak sa presidente sa pwesto.
Konsultahon sa komitiba nga gipangulohan ni Arnaiz ang mga iladong abogado ug constitutionalist sa nasud lakip na kadtong mga sakop sa Philippine Constitutional Assembly ug uban pang mga kahugpongan nga batid sa pagpanday sa constitution aron mahulma ang kaugalingong batakang balaud sa gisugyot nga Visayas Republic.
Kon mahitabo nga mahulma gyud ang maong republic, unsa may mahitabo sa Pilipinas? Mahug kitang kataw-anan atubangan sa international community. Ang usa ka gamay ug huyang nga nasud nabuak tungod sa kahakog sa mga political leaders niini.
Segurado ko nga kon kita mag-umol og Visayas Republic ang Mindanao magkaguliyang usab kay klaro man nga ang mga igsuon natong muslim mosimpan sab sa ilang dugay na nga tinguha nga usa ka independent bangsa moro.
Gubot pas lukot king nasud ta og mao ni mahitabo, ang makalulooy mao ang mga gagmay’ng bata nga mao untay ugma sa atong nasud. Unsa may kaugmaon nga mapaabot sa atong mga anak nga pulos man kahakog ug kagubot maoy atong giandam alang nila?
Ang mga sakop sa Integrated Bar of the Philippines dinhi sa Sugbo maoy nagdugang og haling sa kaguliyang nga nasinati sa nasud sa pagkakaron. Inay sundon ang gitawag og "due process" mao na man hinuoy nag-una sa pagpanawagan nga moresign si Arroyo.
Ang gihimo sa IBP usa ka timailhan nga ‘double standard" ang gisunod nga prinsipyo sa maong kahugpongan kini tungod kay sa sayo pa ang maong grupo nangugat sa pagkondenar ni Mayor Tomas Osmeña nga mosunod sa balaud nunot sa pagduda nga kini maoy nagpaluyo sa nahitabong vigilante killings dinhi sa dakbayan.
Apan karon sila mismo ang wa mosunod sa balaod pinaagi sa wa paghatag og higayon sa presidente nga panalipdan ang iyang kaugalingon sa usa ka proseso nga nasubay sa batakang balaud. Hinuon ang IBP nanawagan ni Arroyo nga moluwat na sa iyang katungdanana, usa kini ka klarong pagpanglangtud sa proseso.