Mangunguot sa jeep

Matawag tang kumon na kining maong kaso. Ang panguot sa jeep dili na bag-o nga modus operandi. Apan angay kitang magbantay tungod kay managlahi og estilo ang mga mangunguot sulod sa PUJ.

Sumala ni texter no. 0920-8928386, adunay mga mangunguot nga magdala og dako nga bag o folder. Mao kiniy itabon sa iyang pagpanguot sa iyang katupad sa jeep.

Aduna usay mga mangunguot nga maoy paboritong biktimahon ang mga pasahero sa bus, sumala pa ni texter 0910-3045780. Kasagaran pito sila ka tawo. Nagkalibhay gihapon og bag ang tagsatagsa kanila. Magkalingaw silag estoryahanay apan ang kamot nagmaneho na diay sa pagpanguot.

Sumala sab ni texter 0916-6480966, adunay mga mangunguot nga nagbase diha sa eskina Leon Kilat St. ug N. Bacalso Avenue. Motipon sila sa bagang panon sa katawhan nga manglakaw. Kon makahigayon, kuotan nila ang ilang kadungan sa paglakaw.

Si texter 0921-5625740 mitaho usab nga adunay mga mangunguot nga mag-atang og PUJ dungan sa mga pasahero diha sa mga jeepney stops. Ila gyong tuyoon ang pagpakigdungan sa mga pasahero nga manakay sa PUJ aron maghuot. Samtang mag-ilogay pagsakay, makahigayon gayod sila sa pagpanguot.

Ang labing ulahi mao ang gireklamo sa usa ka texter nga nagkanayon: "Nabiktima mi nianang mga salbahis nga mangunguot sa jeep. Dagko og lawas. Padulong mi mosimba sa akong amiga sa Sto. Niño Gikuotan mi sa mga lalaki nga dagko og lawas. Next with my husband going to Redemptorist. Lipay ko sa vigilantes aron mahurot na sila." -- 0916-3803201

Busa kon magsakay kamog jeep, ayaw kamo pagkompiyansa kon may motupad kaninyong mga lalaki nga dagko og lawas. Panid-i kon dili ba kadudahan ang ilang mga lihok. Basin mangunguot kana sila. Sumala sa atong texter, maoy sagad sakyan niining maong mga mangunguot ang mga PUJ nga ang biyahe moagi sa Sto. Niño ug Redemptorist.

Sumala pod ni texter 0920-4681170, adunay upat ka mangunguot nga nagbase diha sa eskina P. del Rosario ug Osmeña Boulevard. Maoy ipasalir sa tinonto niining mga tawhana ilabi na sa adlaw’ng Lunes. Maoy sagad biktimahon niining mga tawhana ang mga pasaherong maghulat sa jeep nga mobiyahe paingon sa Mandaue. Magsugod kini sila sa ilang operasyon sa pagpanguot sa kaadlawon.

* * *

(Sumbong ug reklamo? Text sa 0910-8105522. E-mail: [email protected].)