Lihay sa isyu

Pwerteng nakapanubag ni Justice Secretary Raul Gonzalez sa pagduda nga siya o kaha pipila sa iyang mga sakop nasubornohan sa pamilya ni Roderick Go aron ipa-dismiss ang kasong kidnapping ug serious illegal detention nga gipasaka batok kaniya, sa iyang asawa ug pipila ka kauban.

Matud ni Gonzalez nga ingon man g'yod niini ang mahitabo kon dunay kaso, may makadaug ug dunay mapilde. Miingon si Gonzalez nga ang pamilya ni James King nga maoy biktima sa pagpangidnap, dili lang kuno makadawat sa ilang hukom.

Sa akong pagtimbang-timbang, nakahimo gayod og sayop si Secretary Gonzalez tungod sa paghimo niya og kamandoan nga ipabakwi sa provincial prosecutor ang gipasaka niini nga kaso batok sa pamilyang Go diha sa Regional Trial Court.

Ang Supreme Court - nga maoy labing taas nga hukmanan sa nasud - mihukom na nga ang pagpasaka og kaso batok ni Roderick Go, sa iyang asawa ug laing duha ka kauban, nahasubay sa balaod og angay kini nga husayon sa hukmanan.

Si Gonzalez wala gayod motuki sa punto kon siya, isip secretary sa Department of Justice, makahimo ba sa pag-reverse sa hukom sa Supreme Court nga maoy labing taas nga hukmanan sa nasud. Bi, pasabta kuno ang katawhan niining maong isyu Secretary Gonzalez.

Tukma lang tingali ang gilaraw sa mga abogado ni King nga ilang pasakaan og kaso si Gonzalez aron ipataktak kini sa iyang pagka-abogado kay aron matubag pag-ayo ni Gonzalez ang maong isyu.

Mahimong ang kaso unya ni Gonzalez maoy kapanaminan sa ubang abogado ug mga government prosecutors kon mahimo na kini nga jurisprudence.

* * *

Isip paglingi nato niining maong kaso alang niadtong mga wala kaayo masinati niining maong kaso nga naglambigit ni James King ug Roderick Go, nagsugod kini tungod sa dakung utang sa mga Go ngadto ni James.

Naglambigit kini og P40 milyones nga utang sa mga Go ngadto kang James, diin ang gibayad nga tseke miuntol didto sa bangko. Niadtong Hunyo 24, 2002, si Go mitawag ni James kay makig-estorya siya kabahin sa maong tseke adto sa rooftop sa Metrobank diha sa Plaridel Street.

Tuod man, si James King miadto ug giingon nga nagkakita sila og si Go nga takulahaw lang miluglog sa liog ni King, ug misamad-samad sa ubang parte sa iyang kalawasan, dayon gikarga kini sa baggage sa Pajero ni Go.

Ang pasangil mao nga buot patyon sa mga Go si King aron maimpas ang daku nga utang. Sa kadaku niining maong pasangil, angay lang nga husayon g'yod kining maong kaso basi sa hukom sa Supreme Court.

* * *

Kon tinuod man nga huyang na ang Carbon market Unit-1, kinahanglan nga ang kadagkoan sa Cebu City market authority mopakita og lig-on baruganan nga papahawaon g'yod ang mga tindera nga nag-ukopar sa maong building.

Dili kay tugotan ra gihapon ninyo og igo ra nga papirmahon og "waiver" aron nga kunohay wala nay tubagonon ang dakbayan kon may mahitabo sa mga tindera. Tungod kay duna may maninda pa diha unya, duna say mangompra.

Kon ibutang nato nga wala nay tubagonon ang dakbayan sa Sugbo, ang mga pumapalit nga mahugnoan unya sa building kon tinuod man nga gabok na kini tungod sa pagpangliki, wala ba kita'y tubagonon?

Pastilan g'yod kamong mga sakop sa market authority, sigi lang g'yod mo og binayot sa inyong mga hukom. Hasta ang pagpalayas sa mga tindera nga wala na mamayad og buhis sa dakbayan, wala g'yod sila makahimo hangtod karon.

Dili uroy mo mauwaw no nga maghuna-huna nga maayo lang mo's sulti? Timan-i ninyo nga ang katawhan naniid sa inyong mga lihok.