Nakitang tahi

Wa maayo og dispoga kay nakita ang tahi kon sa pinulongan pa ni kanhi Gobernador Pablo Garcia ang kalihukan sa nangangkong Non-Government Organization nga Lakas Pinoy Gawin Natin. Ang maong grupo mipasiugda og usa ka tigom kagahapong adlawa batok sa distabilisasyon ug sa pagpadayon sa political reforms sa gobyerno.

Maayo ang tumong sa maong grupo tungod kay sa ako nang gibalikbalik dili na makaako ang atong nasud nga mosagubang ug laing People Power aron pagpalagpot ni Presidente Gloria Macapagal Arroyo. Apan ang kanindot sa tumong sa maong kalihukan napukan tungod sa pagpanglingla sa mga tigpasiugda niini nga kunohay ilang kabubut-on ang pagtigom aron hisgutan ang kasamtangang sitwasyon sa nasud ug way si bisan kinsa nga nagpaluyo kanila.

Gustong ipagawas sa mga nagpasiugda nga boluntaryong mitambong didto ang mga mag-uuma, tindera, drivers ug uban pang sektor sa mga kabus aron pagsuporta ni Presidente Gloria Macapagal Arroyo. Si Jarvis Prochina ang area coordinator sa Lakas Pinoy miingon nga way labot ang Malacañang sa maong tigom.

Apan daw sa gisili-an ang ilang lubot sa dihang akong gipangutana kon unsay papel sa Malacañang sa maong tigom. Pwerteng nakapangugat ni Dr. Lindy Morell nga wa sila bayri sa Malacañang aron sa paghimo sa maong tigom pagpadayag og suporta sa presidente.

Time pa ra gud Dr. Morell, nganong hilabihan man nimo ka defensive nga unta ang akong pangutana mao nga kon duna bay papel ang Malacañang sa maong tigom? Nahadlok kang paninglan sa ubang mga nanambong sa tigom sa ilang bahin?

Kon tinuod nga way labot ang Malacañang sa maong kalihukan, nganong ang imbitasyon ngadto ni Gobernador Gwendolyn Garcia ug Mayor Tomas Osmeña gikan man sa Office of External Affairs sa Malacañang? Gusto kang motan-aw Dr. Morell? Duna koy kopya sa maong imbitasyon.

Ikaduha, kon tinuod nga way apil ang Malacañang sa maong tigom, nganong ang Public Information Agency man maoy nangimbitar sa mga sakop sa media aron motambong sa press conference?

Ayaw kog ingna nga si Morell wa masayod kon unsaon pagtawag sa mga nagkalainlaing media outlets sa Sugbo nga gikinahanglan pa gyud nilang iagi ang imbitasyon sa PIA? Kon duna poy delikadeza ang mga tigpasiugda sa maong tigom, di man kaha mo gusto nga masagulan og pamolitika ang maong kalihukan nganong didto man gyud sa PIA ninyo iagi ang imbitasyon?

Wa magkinahanglan sa expertise ni Pythagoras ang pagsulbad sa simple kaayo nga mathematical operation nga one-plus-one aron masayod ta nga two ang tubag niini. Wa sab ko makakita sa rason nganong gusto nilang taguan ang kamot sa Malacañang nga unta wa may dautan niini?

Normal lang nga ang Malacañang mangita gyud og alkontra sa nagkagrabing panawagan karon sa pagresign ni presidente Arroyo. Ang dautan kon inyong linglahon ang mga tawo nga nanambong nga kunohay independent ang inyong grupo apan ang tinuod dunay nagpaluyo niini.

Ayaw ko'g ingna nga si Dr. Morell ug uban pang mga nagpasiugda niini ang mikuot sa ilang kaugalingong bulsa aron ibayad sa venue ug sa pagpakaon sa ubay ubay nga mga nanambong niini? Labaw nang di ko motoo nga ang kadtong mga ordinaryong tindera ug mag-uuma nga maglisod gani pagpalit ug usa ka kilong bugas tungod sa kamahal na sa palaliton sa pagkakaron maoy mibayad sa ilang pagkaon didto sa Baseline?