Mao kini ang sitwasyon karon. Nabulit na sa suliran ang nasud tungod sa mga hakog nga lider sa politika nga gustong moilog sa pangagamhanan, kadtong mga walay labot misawsaw pa gyud sa kagubot, hangtod misamot na kita og kagubot.
Ang Hello Garci tape kontrobersiya unta nga mahimo lang resolbahon nilang anaa sa hitaas. Apan, hasta na walay labot misawsaw pa gyud mao nga misamot kalubog ang sitwasyon sa politika ug ekonomiya.
Sa misawsaw sa kagubot si kanhi Cebu Customs District Collector Billy Bibit. Si Bibit adunay kahisagmuyo kang Pres. Arroyo kay walay nahimo ang presidente pagpugong sa iyang pagkalagpot sa puwesto tungod sa kakulang niya sa civil service eligibility. Sa dihang gi-serve ni Customs Commissioner Alberto Lina ang resolusyon sa Civil Service Commission ngadto kang Bibit, walay Arroyo nga mipatunga iyawat na lang unta malugwayan ang iyang pagka-kolektor bisan walay eligibility.
Sa kalagot ni Bibit, sa miaging adlaw nanghambog siyang adunay "recruitment" nga nahitabo sa mga opisyal sa militar nga gradwado sa Philippine Military Academy (PMA) aron mo-alsa batok ni Arroyo. Usa kini ka pasiatab ni Bibit nga gipanghimakak ni Police Regional Office (PRO-7) chief Eduardo Gador, kinsa miingon nga usa gyud siya sa masayod kun ang iyang mga classmate sa PMA mang-recruit.
Laing buhat pagpanglawgaw kining gihimo ni Bibit. Inay motabang siya pagpakalma sa sitwasyon, gitabangan na hinuon niya ang ubang tawo nga anaa sa susama niyang naalkanse sa pamunoan ni Arroyo, nga mobarug ug moapil sa sawsaw sa kagubot.
Pila kaha kabuok Bibit ang anaa sa nasud karon?
Bisan gani kanang mga kuwanggol sa administrasyon, moapil og sawsaw iyawat makabenepisyo kun mapalagpot si Arroyo. Sama pananglit ni Speaker Jose de Venecia Jr., naila unta siyang alyado ni Arroyo, pero miingon siya nga siyay mo-endorse sa impeachment complaint nga gisang-at batok ni Arroyo sa miaging bulan.
Klaro gyud nga panglawgaw! Mosawsaw lang sa kagubot!
Para niya ang impeachment proceedings maoy bugtong 'forum' asa siya maka-depensa sa iyang kaugalingon batok sa mga pasangil nga nanikas siya sa miaging presidential election nga maoy hinungdan nga nakakuha siya og usa ka milyon nga mayoriya batok ni anhing Fernando Poe Jr.
Usik sa kuwarta ug panahon kanang impeachment proceedings. Mo-estatuwa pa gyud ang atong political and economic activities kay atong mga mata adto naman motutok sa proceedings pagtan-aw kinsay nindot og barong tagalog ug amerikana atol sa hearing, kinsay nindot mo-inenglis, malingaw ni Senador Miriam Santiago, ug kinsay magsige og katulog, sama kaniadto sa impeachment hearing batok ni kanhi Pres. Joseph Estrada.
Apan alang kanako, maayo na lang og tiwason kining tanan pinaagi sa impeachment aron masirad-an na kining itom nga chapter sa politika niining panahona.
Kun nagtuo kanang mga nanggubot nga mosaler ang impeachment, hala sige, hatagan na lang nato sila og higayon nga mataral si Arroyo sa impeachment court. Si Arroyo nagtuo man usab nga pinaagi sa impeachment proceedings, makadepensa siya batok sa tanang mga pamasangil batok kaniya.
Sa bulan sa Hunyo, misumada og P12.3 bilyones ang koleksiyon sa customs, nga ubos sa target nga P13.3 bilyones.
Imbes nagkadaghan ang mga multi-national industries sa nasud tungod sa trade and investment program ni Arroyo nga nalakip sa iyang 2004-2010 Medium-Term Philippine Development Plan, miti-urok na hinuon ang koleksiyon sa customs nga nagpasabot nga ni-minus ang kalihukang importasyon.
Usa kini ka hinungdan nga kinahanglan nang hunongon ang kagubot politikal. Daghan ang apektado sa kagubot.
Hunongon na unta ang pangsawsaw aron dili mosamot ang kagubot.