Magdala og bag

Makaingon tingali kamo nga common na nga estilo sa modus operandi sa mga badlongon sa katilingban ang pagdala og bag. Apan lahi kining modus nga akong hisgotan karon. Kalabot kini sa gitaho sa usa ka texter nga nakabasa niining atong lindog nga nagkondenar sa binuhatan sa mga badlongon sa katilingban.

Sanglit tin-aw man kaayo niyang pagkapasabot ang iyang sumbong nga gipaagi sa text, ako na lang kining ipatik nga walay kapin ug walay kulang ug sa kaugalingon gayod niyang berisyon.

Ang iyang text nagkanayon: "Good day. Naa koy i-share nga kasinatian bahin sa mga badlongon sa katilingban. Dugay na silang nag-operate diha sa may DBP Jones dapit, atbang sa Landbank. Labina sa adlawng Lunes mosiaw kini sila. Ang style mao nga upat ka tawo makita nga magdala og bag. Kon tan-awon, mora sab silag gikan sa probinsiya tungod sa ilang bagahe. Inig-abot sa jeep nga para Mandaue, hugopan kini sa mga pasahero. Ang usa kanila mokalit pag-ali sa pultahan sa sakyanan. Ang iyang duha ka kauban nagmaneho sa luyo sa pagpanguot sa mga pasahero. Puyde ipa-surveillance og polis. Magsugod ni sila sa kaadlawon pa. Thanks in advance." -- 0920-4681170 (May 28, 2005 -- 10:30:51)

Maayo tuod nga masusi kining maong taho aron masuta kon unsa kini ka tinuod. Kon mamatud-an nga may mga badlongon sa katilingban nga naglihok sa dapit nga gitumbok sa atong texter, mas maayo nga mahimoan kinig aksiyon sa atong kapolisan. Apan miyentras tanto, pag-amping ug pagbantay lang kamo.

* * *

Alang kang texter 0919-8504217, posibleng usa ka text scam ang nadawat nimong text message gikan sa usa ka unknown texter nga nagpahibalo kanimo nga nakadaog ka og P1 million sa PCF. Kana kon wala ikaw ing giapilan nga promo, dakog purohan nga buot ka lang ilaron sa nag-text kanimo. Sulayig report ngadto sa NTC kay basin may ikatabang sila kanimo. Ang rehiyonal nga buhatan sa NTC matawagan sa (032) 346-0687. Timan-i lang ang cellphone number sa nag-text kanimog congratulatory message.

* * *

(Aduna ka bay nasayran nga modus o paagi sa pangilad? Nabiktima ka na ba sa mga badlongon sa katilingban? Ipaambit ang imong kasinatian aron ang katawhan masayod. Text sa 0910-8105522. E-mail: [email protected]).