IBP: Gloria resign

Di mabasol ni presidente Arroyo ang katawhan nga mawad-an og pagsalig sa iyang liderato ug sa kamatinud-anon sa iyang gipanulti. Kini tungod kay sa pipila ka mga higayon namatud-ang namakak siya atubangan sa publiko.

Unang higayon nga nabisto ang kabakakon sa presidente mao ang iyang paglansar sa miaging eleksiyon taliwala sa iyang pasalig nga dili siya modagan human siya matuboy pagkapresidente atol sa People Power II diin napalagpot si kanhi Presidente Joseph Estrada.

Wala pa gani siya motangkod nga usa ka tuig sukad sa iyang paglingkod human modaog sa eleksiyon nabisto nasab ang lain niyang pagpamakak sa katawhan. Si Arroyo sa iyang public address sa miaging Lunes diin siya nangayo og pasaylo sa kontrobersiyal nga "Hello Garci tapes" iyang giangkon nga siya ang gikahinabi sa usa ka opisyal sa Comelec nga naghisgot sa pagpanikas sa milabay"ng eleksiyon.

Matud ni Arroyo nga buot lang niyang protehian ang iyang botos hinungdan nga siya mitawag sa usa ka opisyal sa Comelec. Laing bakak tungod kay human na ang canvassing niadtong higayon nga mitawag siya sa usa ka opisyal sa Comelec.

Kon buot lang niyang protehian ang iyang boto nganong opisyal man gyud sa Comelec ang iyang tawgon, nganong di man ang iyang mga lider sa politika? Dunay bahin sa ilang conversation nga nangutana ang presidente ngadto sa opisyal sa Comelec kon duna ba silay kopya sa Election Returns didto sa usa ka dapit sa Mindanao, unsa may ipasabot niya niini?

Kini maoy pipila sa mga hinungdan nganong wa motuo sa iyang sinsiridad ang katawhan. Gani pagmatuod nga dili lang ang oposisyon maoy wala motuo niya mao nga ang Integrated Bar of the Philippines Cebu City chapter mipasar og resolution niadtong miaging adlaw nga nag-awhag kaniya nga moluwat na sa katungdanan.

Matud sa IBP nga nawad-an na sa moral capability ug credibility si presidente Arroyo sa pagpamuno sa nasud. Ang mga sakop sa IBP dinhi sa dakbayan miingon nga ang pag-angkon ni Arroyo nga siya maoy gikahinabi sa opisyal sa Comelec nakahatag og dako kaayong kauwawan sa mga Pilipino atubangan sa international community.

Ang IBP nagkanayon nga klarong nakalapas si Arroyo sa iyang oath of office lakip na sa Constitution tungod sa iyang pagbudhi sa katawhan nga igo nang hinungdan sa pagpalagpot kaniya sa katungdanan.

* * *

e-mail:[email protected] or text 09208370527