EDITORYAL - Makasamot kaalegre ang politika

Nagkaalegre ang politika sa nasud. Atong gipili ang pulong alegre -- imbes sa nagkainit ug nagkagubot--kay matud pa sa usa ka inilang langyaw'ng journalist "I find the current political situation in the Philippines very entertaining."

Nisamot ang pagka-"entertaining" sa atong politika dihang ni-enter na sa "entertainment" si Susan Roces kinsa maoy expertise ang pag-entertain sa mga tawo.

Adtong Miyerkules sa gabii misalga si Susan sa kontrobersiya kalabot ni Presidente Gloria Arroyo ug sa pag-angkon niini sa "Hello Garci" tape diin human sa maong pag-angkon nangayo kinig pasaylo ngadtos katawhan.

Wala dawata -- ang pag-sorry ni Gloria -- ni Susan. Hulip niini, iyang gibanatan og mga sakit nga pulong ang Presidente. "Arogante," "kawatan og botos," "walay uwaw," etc. Mitanyag usab siya sa pagpangulo sa nasud kun mawa na si Gloria sa Palasyo.

Ang gihimo ni Susan atubangan sa mga sakop sa prensa ug gipadayag sa tibuok nasud pinaagi sa telebisyon ug radyo nakahaling og samot sa kasamok sa politika sa nasud.

Ang mga panatiko ni FPJ ug ni Erap nanglumpayat sa kalipay nga duna na silay lider padung sa Palasyo. Nangisog ug samot sa ilang pakig-away batok sa Presidente.

Busa gikan ning adlawa magkasamot kaalegre ang politikanhon atmosphere nga ginganlan sa usa ka langyaw'ng periodista nga "entertainment."