Sir Loot, kaya mo yan

Nakadungog ko og report nga ang higala nako nga si Koronel Vicente Loot, maoy padumalahon sa Regional Anti-Illegal Drugs Special Operations Task Force.

Buyno, lain na usab kining hagit sa katakus ni Koronel Loot.Basi sa rekord, walay bisan kinsa nga opisyal sa Constabulary Anti-Narcotics Unit, Narcotics Command, Narcotics Regional Office, Regional Anti-Narcotics Office, nga nakabentaha sa iyang accomplishment.

Si Loot maoy responsible pagkasakmit sa tulo ka kilo nga shabu gikan sa usa ka Muslim nga nadakpan didto sa Santander. Gikan adto, dakung shipment sa shabu didto sa Manila nga nasakmit pinaagi usab kaniya.

Ang dakung tabang nga nahimo ni Loot sa kalampusan pagkasakmit sa dakung shipment sa shabu sa Manila wala lang niya ipahibalo tungod sa usa ka mahinungdanong rason nga dili nato ikatug-an.

Kaya mo yan Sir!

* * *

Dunay mireklamo nako kabahin sa mga motorsiklo nga nagbiyahean sa Carcar - ilabi na diha sa kabukiran - nga nakapalagot sa pipila ka lumulopyo tungod sa pagtuyo nila pagtaud og muffler sa ilang mga sakyanan aron g'yod modaku ang tingog sa makina.

Nangutana ang mireklamo kon mahimo ba kini nga idili tungod kay nakabantay siya nga adunay lagda kabahin niini diha sa atong balaod.

Buyno, alang sa kasayuran niadtong wala pa masayod, dunay lagda nga gilatid ngadto sa mga tag-iya ingon man sa mga tighimo og sakyanan nga mabasa ninyo sa section 34 ( j ) sa Land Transportation and Traffic Code.

"No motor vehicle shall be operated in such manner as to cause it to emit or make any unnecessary or disagreeable odor, smoke or noise."

Sagdi lang, atong kuhaan og reaksyon niini ang kadagkoan sa LTO. Nakabantay sab bitaw ko nga dunay mga tag-iya og sakyanan - bisan awto - nga tuyoon g'yod nila pagbutang og dagko nga muffler ang ilang sakyanan aron nga modaku ang tingog.

Unsaon, balit-ad ang utok aning mga tawhana. Ang sagad sa mga tag-iya og sakyanan motaud pa gani og silencer sa ilang mga sakyanan aron nga mohinay ang tingog, apan sila hinoon pakusgon ang tingog.

Kamong mga mananakop diha sa Carcar, sama ni LTO deputized agent Maximo Bustamante, hala ipakita ang imong abilidad.

Nakabasa ka na man sa mga lagda sa Transportation and Traffic Code nga gilatid sa section 34 ( j ) kabahin sa pagtaud og muffler.

* * *

Dunay nagpakisayod nako kagahapon kon kinsa ang tawo nga mipahibalo kanako sa giingong shabu pusher diha sa barangay Pacnaan.

Kon unsa may inyong tumong, wala kamoy mahimo. Ang ngalan sa akong mga informer magpabilin nga "confidential" bisan pa man og kinsa ang momando tungod kay kaming mga sakop sa media, dunay balaod nga gitamdan.

Ang Republic Act 1477 naglatid nga "A journalist cannot be compelled to reveal the source of his news unless it involves the security of the state." Aron kamo makapugos pagpatug-an nako, iprobar una nga ang isyu nga atong gi-take-up naglambigit og siguridad sa nasud.Okey ba?