Modus sa mga peke nga produkto

Ang mga awtoridad mipahimangno sa publiko kalabot sa pagkaylap karon sa daghang klase sa mga "mini" o peke. Gipalusot kini pinaagi sa nagkadaiya usab nga modus operandi sa mga badlongon sa katilingban nga nagpaluyo niini.

Pananglit, ang pagdagsang karon sa mini nga mga kuwartang papel sa denominasyon nga P500 ug P1000. Ang estilo mao nga sa higayon nga mograbe ang krisis, maoy ipakatap nila sa maong matang sa kuwarta nga walay kalag. Bisan gani ang dolyar wala makaipsot niining maong matang sa raket.

Pero dili lang aktuwal nga kuwarta ang gipeke karon sa mga badlongon sa katilingban kondili lakip na ang mga produkto. Gani gikataho man nga atol sa panahon sa tingbukas sa mga klase, midagsang usab ang mini nga mga school supplies.

Matawag tang seasonal ang pagpasalir sa mga badlongon sa ilang modus operandi. Kon unsay "in" sa usa ka partikular nga season, mao usab kanang matanga sa produkto o serbisyo ang ilang pekeon.

May taho usab nga midagsang na usab ang mini nga tambal, mini nga sigarilyo, mini nga bino, mini nga pantalon, sinina ug uban pang matang sa sapot. Popular sab kaayo ang mini nga pahumot (perfume), mini nga sapatos, mini nga bag og daghan pang mga palsipikadong produkto.

Gitawag kinig mini tungod kay ila mang gikopya ang desinyo sa orihinal nga produkto apan hawa sa kalidad ang mao nilang produkto. Kon mini na ang tanan, dako kining sabotahe sa ekonomiya tungod kay ang maong mga produkto dili man mapahimuslan pag-ayo sa makapalit niini.

Dugang niini, aduna pa gayoy mga mini nga polis nga manakop, mini nga abogado nga mangilad sa ilang mga kliyente, mini nga huwes nga mopahigayon og mini nga kasal, mini nga pari ug daghan pang lain nga mga "mini".

Haskang paita. Pagbantay gayod kamo sa modus niining mga tawhana.

* * *

(Sumbong ug reklamo? Text sa 0910-8105522. E-mail: [email protected])