Lipat-lipat style

Kon ikaw adunay tindahan o kaha sinaligan sa tag-iya sa usa ka tindahan, basaha kini aron ka makabantay. Niay modus operandi karon nga lipat-lipat ang style ug ang mga tindahan maoy kasagaran ig-on.

Usa ka magbabasa niining lindog nag-text nga nagkanayon: "Naa koy kasinatian bahin sa modus operandi. Usa ako ka tindera diri sa Naga. Naay tawo nga mopasumangil og palit. Ang iyang modus mao nga hatagan ka niya og tibuok P1,000 isip bayad sa iyang gipalit. Kon wala kay ikasulti, anha siya mohuwam nimo og kuwarta para ibayad kuno sa iyang paliton sa lain nga tindahan. Lipat-lipaton ka. Ang P1,000 niya dili ibilin." -- 0920-3924746

Ang sekreto aron dili mailad niining maong paagi sa tinonto mao ra gayod ang pag-amping. Dili mosanong bisan unsay isulti sa suspek. Dili magpahulam og kuwarta ilabi na kon dili kaila ang mopalit. Mao ra bay sagad ipasalir sa tinonto sa maong mga suspek kon busy ang tindera sa pagtagad sa daghang mga kustomer kay sa ilang hunahuna, nalinga pag-ayo ang maong tindera.

Busa kamong mga manindahay, kon makasugat mog ingon niining estilo sa approach, ayaw gayod kamo pagtuo sa bisan unsang isulti sa tawo nga magpakaaron-ingnon og palit apan sa kapulihay manghuwam na hinuon ninyo og kuwarta. Ayaw ninyo patoli ang bisan unsang iyang isulti.

Sa laing bahin, niay text reklamo bahin sa Globe ug Smart:

"Good day, Sir. Makalagot kaayo nang Globe, uy. Magsigeg pasa aning text sa mga artista nga wa man unta ko magpa-register. Dagko baya kaayog kuhaon nga load. Thanks." -- 0927-2332627

"Kakawatan pod og load anang Smart, uy. Kaduha ra gani ko ni-reply sa nagtext nako zero balance man dayon. Mokaltas pa gyod kon mag-surfing ta, unlike the other network nga dili mokaltas." -- 0915-4408402

* * *

(Text sa 0910-8105522. E-mail: [email protected])