Metro Manila congressman masyadong suwitik

ALAM n’yo bang inirereklamo ang isang congressman sa Metro Manila dahil masyadong suwitik?

Ayon sa aking bubuwit, happy birthday kay Jess Garcia ng DZRH; Edwin Montilla, Leo Dagamac ng Caltex; Bro. Carl Nitura at Atty. Tony Paguirigan.

* * *

Alam n’yo bang manloloko pala at suwitik ang isang congressmang taga-Metro Manila?

Ayon sa aking bubuwit, marami nang mga negosyante ang nagrereklamo laban kay Congressman dahil sila ay niloko. Ang isang modus operandi ng kongresista ay ang check rediscounting.

Siya ay mangungutang ng malaking halaga at ang ipambabayad nito ay tseke.

Kaya lang ang problema, ang tsekeng iniisyu sa mga pinagkakautangan niya ay biglang irereport sa banko na nawala.

Hindi kaya nahihiya si Congressman sa kanyang ginagawang katarantaduhan? Ang kapal ng mukha mo, Congressman!

* * *

Ayon sa aking bubuwit, isang businesswoman ang inutangan ni Mr. Congressman ng P5-milyon. Dalawang post-dated check ang inisyu ni Congressman bilang kabayaran. Ito ay isang P3-milyon at isang P2-milyon ang halaga.

Pagdating ng maturity date, nang ideposito na ang tseke, ang sinasabi ng banko ay inireport daw ni Congressman na nawawala ang naturang tseke. Eh di siyempre, hindi tatanggapin ng banko ang check.

Kapag tinatawagan naman si Congressman, siya ay nagtatago na. Pati mga staff ni Congressman ay sinasabihan din na wala raw siya kapag tumatawag ang kanyang mga pinagkakautangan.

Walanghiyang congressman ito!

* * *

Ayon pa sa aking bubuwit, bukod sa isang businesswoman na inutangan ni Congressman ng P5 milyon, niloko rin niya ang isang travel agency.

Si Congressman ay nag-abroad kasama ang kanyang pamilya. Kumuha siya ng plane tickets para sa kanilang biyahe. At ang malungkot na parte rito, tseke na naman ang ibinayad niya.

At nung idedeposito na ang tseke, nagulat din ang may-ari ng travel agency sapagkat ’yung ibinayad sa kanyang tseke ni Congressman ay inireport din sa banko na nawawala.

Nang habulin si Congressman sa kanyang opisina, ito ay hindi rin matagpuan sapagkat pinagtataguan ang kanyang mga niloko.

Hayup ka talaga congressman! Mandaraya kang talaga!

Ang congressman sa Metro Manila na binansagang Cong. Lost Check dahil parating nawawala ang kanyang check book ay si Congressman… Siya ay si Congressman E. as in Epifanio delos Santos Ave.