Si Pope Benedict XVI

PORMAL nang nailunsad si Cardinal Joseph Ratzinger bilang Pope Benedict XVI noong Linggo, Abril 24. Siya ang ika-265 Pope. Ang inagurasyon ay nasaksihan ng milyun-milyong katao sa buong mundo sa pamamagitan ng cable televisión – isang makasaysayang pangyayari sa Simbahang Katoliko at industriya ng TV broadcasting, sapagkat kahit mismo si yumaong Pope John Paul II, sa kanyang inagurasyon noong 1978, ay hindi naranasang mapanood ng ganoong karaming katao dahil sa hindi pa gaanong kaangat noon ang teknolohiya ng pamamahayag sa TV.

Ang mga nakapanood sa telebisyon ng inagurasyon ni Pope Benedict XVI ay nakita ang anggulo ng Vatican, hanggang sa malapitang pag-focus sa singsing ng Papa ay kitang-kita ng mga nanonood. Pati na rin ang napakagandang tanawin ng libu-libong taong nakilahok sa inagurasyon mula sa anggulo ng tuktok ng isa sa mga cupola ng St. Peter’s Basílica.

Ang inagurasyon ay nakakaantig dahil sa mga simbolong ginamit – mga simbolong nagmula pa noong ika-apat na siglo: Ang pallium isang mala-lanang telang puti na may limang burda ng krus, na inilagay sa balikat ng Papa, na sumasagisag sa "pamatok ni Jesus" na ibig sabihin ay dala-dala o nakaatang sa mga balikat ng Pope ang tungkulin at gampanin na ginampanan dati ni Jesus – ang Mabuting Pastol; at ang singsing kung saan nakatatak ang larawan ni San Pedro, ang unang Obispo ng Roma, na pinaghabilinan ni Jesus ng pangangalaga ng Kanyang mga tupa ganoon din ang susi ng kalangitan.

Bagamat mahaba ang Misa at sa wikang Latin, tiyak na lahat ng dumalo at mga nanood sa telebisyon na mga Katoliko ay naintindihan ang iba’t ibang bahagi ng Misa, sapagkat iisa lamang ang buod at daloy para sa pandaigdigan Simbahan.

Pero sino nga ba si Pope Benedict XVI? Bakit iyon ang pangalang kinuha ni Cardinal Joseph Ratzinger? Bakit tinawag na "Lingkod ng mga Lingkod ng Diyos" ang Pope?

(Itutuloy)