Bukod sa pagiging abusado nitong si Kagawad Torres, butangero pa ito at mahilig manakit sa tuwing siya’y malalasing.
Ayon sa ilang residente ng kanilang barangay, aspiring daw sa pagiging Kapitan itong si Torres.
Tsk-tsk-tsk! Talaga nga naman, kung sino pa ang butangero’t abusado siya pa ang nailalagay sa puwesto. Kapag ganito ng ganito ang sistema, tiyak na darami pa ang mga opisyales ng barangay na kakastiguhin ng BITAG.
Sa National Bureau of Investigation National Capital Region (NBI-NCR), nahalungkat namin ang patung-patong na kaso ni Torres. At kung ito ang aming pagbabasehan, walang karapatang manilbihan ang "bulok" na kagawad sa kanilang barangay.
Dito makikita ang hindi magandang sistemang umiiral sa barangay. Nagiging "praktisan" lamang ito ng mga kolokoy na nangangarap ng mas mataas na posisyon sa pulitika tulad ng butangerong kagawad na si Wilfredo Torres.
Makailang beses na rin naming naipakita sa BITAG ang kabulukan ng ilang opisyales ng barangay. Mapapansing ginagamit lamang ng ilan ang kanilang "posisyon" upang mangurakot at magpayaman.
Kung kami sa BITAG ang tatanungin, mas makabubuting buwagin na lamang ang bulok na sistema ng barangay.